ASF-in Krismas ruai nghawng lo

ASF-in Krismas ruai nghawng lo
Kum liam taah African Swine Fever (ASF)-in Mizoram a nuai a, Mizoramin vawk engemaw zat a chan. Mahse vanneihthlak takin Krismas ruai leh Kumthar ruai a nghawng lo.
Krismas leh Kumthar lawmna ruai atana talh tur vawk a awm a, vawk talh tur hi a van phah lo nia hriat a ni.
AH&Vety department lam chuan ruai atan vawk a awm turah an ngaih thu The Aizawl Post an lo hrilh lawk a, vawk hi Mizoramah a tam ve tawh a, hri vangin thi nasa mah se vawk talh tur a awm reng a, ruai atana hman tur pawh a awm ang tiin an sawi.
An chhinchhiah danin, 2024 chhung khan ASF vangin Mizoramah vawk 14950 a thi a, ASF vang hian vawk 24177 tihhlum/suat a ni bawk.
Ran chhiarpui hnuhnung ber, nikum January-a neihah khan Mizoramah vawk nuai chuang a awm a, ASF vangin vawk a sing tel a thi chungin Mizoramin vawk a lo ngah ve tawh avangin vawksa ei tur chungchangah harsatna a awm lem lovah an ngai.
AH&Vety department hotute chuan Mizoramin vawk a ngah ve tawh thu an sawi a, ASF hi leng lo phei se chu Mizoram hi vawkah a intodelh viau tawh ang an ti.
ASF hrileng hi nikum kum tawp lamah khan a zia a, kuminah pawh January ni 4 thleng khan ASF vanga vawk thi leh tihhlum a la awm lo.