FMR tih tawpna hlip leh turin India sawrkar kan ngen – ZORO
FMR tih tawpna hlip leh turin
India sawrkar kan ngen – ZORO
Myanmar leh India ramria zalen taka inkalpawh theihna India sawrkarin a tihtawp tak chu hlip leh turin an ngen tih Zo Re-unification Organisation (ZORO) chuan an sawi.
ZORO Gen. Hqrs. thuchhuak chuan, India sawrkar Ministry of Home Affairs (Border Management -I Division) chuan 2024 December 24 khan Mizoram chief secretary hnenah lehkha thawnin, India -Myanmar international ramri kalkan tura thil tih dan tur a hriattir a. Chumi dungzui chuan Mizoram Home department-in 2024 December 30-ah Director General of Police Mizoram hnenah ramria hma lak dan tur a thawn a. Chumi dungzui bawk chuan Champhai Superintendent of Police chuan mipui hriattirna tichhuakin, Myanmar leh India ramri kaltlang tur reng rengin border pass an neih a ngaih tur thu a puang ta tih a sawi.
United Nations Declaration on the Rights of Indighenous Peoples 2007 Article 36-ah – “Tualchhuak hnamte, a bikin khawvel sawrkar ramri khamin a thendarhte chu an inkalpawhin an intanpui anga, sakhaw thil leh khawtlang thil, ei leh bar leh politics-ah anmahni mi leh sate nen inpawha inpawl ho theihna dikna chanvo an nei;” tih leh, “Ram roreltute chuan tualchhuak hnamte nena inbe rawnin hetiang dikna chanvote hi tipuitling turin hma a la ang,” tih a awm a. He Declaration UN General Assembly-a sawihoa pass a nih lai hian India chu tha tia vote tu a ni tih a sawi bawk.
Hemi chungchangah hian ZORO pawhin India President leh Prime minister hnenah lawmthu a sawi tawh laiin, tunah UN Declaration on the Rights of Indigenous Peoples 2007 dodal zawngin India sawrkar chuan hma a la leh lawi tih sawiin, tunhma atanga Zofate zalen taka inkalpawhna – Free Movement Regime a thiat ta a, border pass tel lo chuan tumahin ramri kanin kan unaute tlawhpawh phal a ni ta lo tih a sawi a ni.
Free Movement Regime (FMR) titawpa India-Myanmar ramri kan tura border crossing permit lak a ngai ta chu ZORO chuan pawi a tih thu sawiin, ‘UN-in Declaration on the Rights of Indigenous Peoples 2007 Articles 36 (1) & (2) a a tarlan, dikna chanvo (right) min pek kan hmang thei lo tur hi kan dikna chanvo rahbehna a ni a. India sawrkar hian FMR a tihtawpna hi hlip leh turin kan ngen a ni,’ a ti. He dikna chanvo nei let tur hian ZORO chuan a tawp thlengin a bei zel dawn tih a sawi.