Ramri kan turin ‘mask’ vuah a ngai
India sorkarin Mizoram leh Myanmar inkalpawhna lei a vil khauh telh telh a, tunah chuan ramri kan turin mask vuah a ngai tawh.
Champhai District-a Zokhawthar khaw bul |iau lui chunga lei kanin Mizoram leh Myanmar lam hi zalen taka inkalpawh theih a ni thin a, hei hi sumdawnna kawng pawimawh pawh a ni thin. Nikum lam atang khan India sorkar a khauh thar a, a khauh telh telh bawk.
Kum tharah hian Mizoram atanga Myanmar lama kal tur leh Myanmar atanga Mizorama kal turin Border Pass a ngai ta a, hei hian mipuiah harsatna a thlen nghal. January ni 9 atang khan Border Pass neia lui kan tur hian Assam Rifles te’n mask vuah tur an ti a, thlalak thehluh tur an ti bawk.
Zokhawthar VC president Lalmuanpuia chuan mask hi tunlai hrileng vang a nih thu a sawi a, Assam Rifles te’n Mizoram lam atanga kal turte leh Myanmar lam atanga rawn kal turte chu mask vuah tura an tih bakah thlalak thehlut zel tura an tih thu a sawi.
Mizoram atangin Myanmar-a kal thei lo an thahnem tih a sawi a, Border Pass dil phawt a ngaih avangin hun a heh a, Border Pass neite tan pawh inziak lut tura intlar a ngaih avangin hun a heh a, kir leh an thahnem thin tih a sawi.
Mizoram atanga Myanmar-a kal turte hi Rihdil tlawh tur te, Buannel-a kal tum te, bazar tura kal tumte an ni tlangpui tih a sawi a, chhung leh khat intlawha kal tur an ni bawk tih pawh a sawi.
Zokhawthar leh an chhehvel Myanmar lam chu inthian tha leh inchhung hnaivai an ni a, nupui pasala innei te, chutiang chu Zokhawthar chauh ni lovin Mizoram khaw dangah pawh an awm tih te, chung mite chu an intlawhpawh hlei thei tawh lo tihna a nih thu Zokhawthar VC president chuan a sawi.
An khuaah raltlan mi sang sarih dawn an awm thu pawh a sawi a, anni pawh hi tihian Zokhawtharah an tang ta tihna a ni mai thu a sawi. Border Pass nei turin Aadhar card emaw EPIC emaw a ngaih avangin raltlante tan Border Pass neih ngaihna a awm loh thu a sawi.
Nikum July ni 25 atang khan leiah hian bungraw ken phal a ni tawh lo a, mihring inkalpawh chiah phal a ni. Kum tharah Border Pass neih a ngai tih a ni leh ta a ni.