Mizoram WCD tih dan tha state dang ho entawn tura tih a awm – Lalrinpuii

Mizoram Women & Child Development (WCD) department chu ram pum huapin a thawk tha pawl a ni a, ngaihtuahna thar tha tak an kalpui thin avangin sawrkar laipui pawhin tha tiin, state dang ho entawn leh tih ve atana tih a nei hial tih an minister Lalrinpuii chuan a sawi.
Cheng nuai 44.75 senga sak Lungsen ICDS office building thar chu WCD minister Lalrinpuii hian a hawng a. A hranpaa sum hmuh awm loa CDPO leh WCD hotute hmalaknaa office building thar tha tak sak leh hawn theih a ni chu lawmawm a tih thu sawiin, mi tih dan phung leh tih thin tawh dan ang zui mai loa, mipui tana thil tha zawk a thlen theihnana hma thar la ngam officer leh sawrkar hnathawk an awm thin chu chhuanawm a tih thu a sawi.
Mizoram chuan WCD hmalaknaah India ram pum huapin a titha thawkhat viau tih sawiin, “Inkaihhruaina (guidelines) khauh tak, phai ram mila duan hmang chungin department hotute leh thawktuten ngaihtuahna thar sengin hma an la thin a. Chu’ng hmalakna chu sawrkar laipui pawhin tha tiin, state dang entawn tur leh tih ve atan hma a la hial a ni,” a ti.
Tunhnai lawka Poshan Maah – Nutrition Month hnuaia ei leh in tur tha pawimawhna inzirtirnaah pawh Mizo nunphung nena inmil tak – “Wadi Makpa” chin chhuah thar a ni, tiin, sawrkar leh mipui vantlang thawhhona tha nei tura ruahmanna a ni a, mipui vantlangin sawrkar hmalaknaa neitu nihna tam zawk an neih a, ta neihna tak tak an neih theihna tur a ni tih a sawi bawk.
Damdawi tel lo, hlo tur tel lo thlai chi hrang hrang thar chhuah a nih theihnan department-in Poshan Vatika hnuaiah chuktuah huan, “Nutri Garden” an siam tih minister hian a sawi a. Anganwadi Centre-a naupang leh nau paite tana chaw tha sem thinah pawh a theih chin chinah khawtuala thar chhuah sem tura ruahman niin, rannung thahna hlo leh hlo tur chi hrang hrang hmanga enkawl thlai ei chu hriselnain a tuar thei a, mahni thar ngei chawhmeh thianghlim, damdawi pawlh loh nei thei turin khaw tinin intodelh tumin hma la thar se a duh tih a sawi a ni.
WCD director Zoramthangi Chhangte chuan he building sakna atan hian eng scheme atang mahin sum hmuh hranpa awm loa sak puitlin a ni chu a hlutna leh a danglam em emna a ni tih a sawi.
Lungsen ICDS Project hi kum 1983-a din a ni a. Tuna office building thar hi office-in fund an hmuhte renchem taka hmangin, office sakna atana tlem tlema sum an khawl hmang leh directorate atanga puihna hmanga sak niin, a sakna atan hian Rs. 44,75,248 sen a ni. Office sak hna hi November 2025-ah tanin, October 2026-ah zawh a ni a. A building hi Zopa chhiara chhawng thum a ni. First floor hi office atan, a chungah CDPO quarters, ground floor-ah training hall leh store room a awm.