Mipui hnena loan pechhuak tlem bank-te kan mamawh bik lo – CM

Mizorama bank inbun zingah mipui hnena loan pekchhuah kawnga thahnemngai lo lutuk chu state-in a mamawh bik lem lo tih chief minister Lalduhoma chuan a sawi
Bank hrang hrang aiawh telna Special State Level Bankers’ Committee Mizoram for the quarter ended September 2024 chu chief minister kaihhruai hian Nilaini khan Aizawlah neih a ni a. Mizoramah bank engemawzat awm ve tawh mah se, a tam zawk hi Aizawl leh district capital-a inbun an la ni a. Banking network tha leh zau, hmun kilkhawr zawk amite ban phak kan mamawhna a sang hle, tiin, inzar zau zel turin a ngen.
Credit deposit ratio-ah hmasawnna hmuh a ni chu a lawm hle rualin, bank thenkhat CD ratio hniam leh lutuk, 40% aia hniam engemawzat la awm chu fel loa an hriat thu a sawi a. Bank thenkhat phei chuan 20% pawh an phak lo tih hrilhin, “Kan ram atangin deposit in dawng khawm a, chuta tanga 20% vel kan ramah in puk chhuahtir a, a dang 80% vel state dangah in puk chhuahtir tihna a ni. Hei hi Mizo mipui zah lohna a tlingin ka hria. Sumdawnna atan chauha min rawn hmang bank hi kan mamawh lem lo. Hmasawnna hna min thawhpuitu tur kan duh,” chief minister hian a ti.
SLBC awm leh huna hma sawnna report hmuh tur a awm loh phei chuan ngawih ral an tum lo tih a sawi a. “Kan ka kan an chuan dawrtu nei lo bank in ni ve der thei,” tiin, CD ratio nei tha lo zual – Yes Bank, Bandhan Bank, Axis Bank, ICICI, HDFC, CBI, Federal Bank leh NESFB chu lo tang zual turin a chah.
Priority sector lamah pawh inthlahdah lo turin Lalduhoma hian a chah a. Sawrkarin mirethei zawkte khai chhuah tumin agriculture & allied sector-ah leh MSME lamah thapui thawhin hma an la chho dawn a, bank-te chu an thawhpui pawimawh ber zing ami an ni, tiin, staff indaih loh kawngah pawh harsatna an tawh lohnan hma la theuh turin a ngen tih a sawi bawk.
Thutkhawmah hian SLBC thutkhawm hnuhnung bera an rorel bawhzuina report an ngaithla hmasa a, chumi zawhah bank hrang hrang deposit leh advances dinhmun thlirin, sawrkar ngaihpawimawh bik sector hrang hranga Annual Credit Plan (ACP) dinhmun enfiah a ni. Financial inclusion leh RSETI lama hma an lakna, aspirational district leh block huamchhunga hma an lakna, Mizorama large currency chest neih ve chungchang bakah African Swine Fever lam hawi hmalakna pawh sawiho a ni.
Adviser to CM pahnih – TBC Lalvenchhunga leh Dr KC Lalmalsawmzauva, chief secretary Khilli Ram Meena, Finance commissioner Vanlaldina Fanai leh a kaihhnawih sawrkar official-te, Mizorama bank hrang hrang thuneitute thutkhawmah hian an tel a ni.