Getafe muala chak zo lo Barcelona!

Getafe muala chak zo lo Barcelona!
Inrinni Spanish La Liga inkhel pakhatah Barcelona chuan season kal lai league-a point an hloh zawn vawilina ni turin Getafe mualah 1-1 draw bak an pel zo leh lo a; inkhelh bana sawi zui hlawh ta ber erawh home fans lam atanga Barca full-back Alejandro Balde chhaihnawmnah chungchang a ni.
He mihang defender hian inkhelh laiin Getafe player-te’n chi inthliarna lam hawia an deusawh chungchang referee a hriattir a, stadium chhunga aurinna hmangin supporter-te chu an thiltih bansan tura hriattirna tihchhuah a ni.
Inkhelh banah Spaniard Balde chuan Movistar hnenah fans thenkhatin racist zawnga an beih thu hrilhin, khati ang thil kha thleng tawh lo atana a duh thu a sawi tlang nghal.
Barcelona boss Hansi Flick pawhin amah bawrtu reporter-ho hmaah, “Kha ti ang thil khan football-ah chauh ni loin he hringnunah hian hmun a chang ngai tur a ni lo. Kha thil thleng kha a awihawm loh hial zawk a, a dik lo hulhual a ni.
“Khati ang mite kha inkhel en tura lo chhuak ve tlak pawh an ni lo a, ina tawm hmak tur an ni.
“Anni ang ho kha kan beilet ngei turah ka ngai a, chu chu kan zavaia that tlanna ber tur a ni. An kianghnaia mite pawh khan tih theih an nei ngei turah ka ngai a, he thil huatthlalaawm zet do tur hian mi zawng zawgin tih theih kan neiin ka hria,” a tichhuak ve hlawih hlawih!
Flick-a team kha Copa del Rey leh Spanish Super Cup chhiarzawma match li chak zawn lai ni mah se chak an harsat kaltluan mekna La Liga lamah erawh hnehna an chang zo leh lo a, kum 2024-a an match hnuhnung pathum atangin point khat chauh an hlawhchhuak zo a, kumin top flight-ah pawh leirem an la rap zo ta chuang rih lo!
Estadio Coliseum chhunga mipui 15,134 chhuak khawm hmaah Jules Kounde chuan minute 10 an khelh tlin hma chiahin David Soria dan zawh loh goal a khung zet a, darkar chanve khelh pelh hnu lawkah Coba da Costa gol tur chu Barca keeper Inaki Pena chuan dansak mah se ball letleh nangfuhin Mauro Arambarri chuan Getafe siphurh a sut a, hun tawp thlengin goal dang a luhbelh zo lo.
Nou Camp club tana Frenkie de Jong-a shot pui zet chu engtin tin emaw dive chungin Getefe goal-veng Soria chuan a dansak thei hlauh a, chak mamawh Flick-a team an hawihil leh ta rih a ni.
La Liga table-a pathumna luahtu Barcelona hian Inrinni inkhel danga Leganes laka tlawm Atletico Madrid chu point ngain an la pha lo cheu!
Spanish La Liga bika Barca an mikhual hnuhnung vawingaa tlawm nei lo Getafe chuan relegation zone an la lut lo chiah chiah a, point khatin an him leh rih!