Sawrkar inrawlh avangin sawhthing rate chhiat hlau

Sawrkar inrawlh avangin sawhthing rate chhiat hlau
ZPM sawrkar chu sawhthing leh hmunphiah hralhah a inrawlh avangin a rate a tihchhiat phah a hlauhawm tih MNF MLA Robert Romawia Royte chuan a sawi.
Hachhek bialtu MLA Robert Romawia Royte hian a bial a fannaa amah lo dawngsawngtute hmaah kum kaltaah Assam, Nagaland leh Meghalaya ah hmunphiah rate a that kum a nih laiin ZPM sawrkarin lei tuma insawia a inrawlh avangin Mizoramah hmunphiah rate a chhe vek a. Sawrkar inrawlh loh laiin sawhthing rate a tha reng a, sawrkar inrawlh avangin sawhthing leh hmunphiah rate a chhe leh ang tih a hlauhawm hle tih a sawi.
Village council leh local council inthlan hun sawn hma vak chu democracy pawngsualna a ni tih MLA hian a sawi a. ZPM sawrkar chuan an intiam ang an ti thei dawn lo tih hrechiangin an mualpho zual zel hmaa VC leh LC inthlan hi ti hma ta an ni, tiin, “He thutlukna chauh pawh hi ZPM hnawlna tham a ni,” a ti.
ZPM-in kum khat chuang rorelna a chan hnuah pawh Hachhek bialah hmasawnna hnathawh sawitham a neiloa, MNF sawrkar sum sawichhuah sa leh sawrkar hmasa hna pek tawhsa cancel a, ZPM party miten hna chhe tak taka an thawhte chu an sawi tur neihchhun a ni mai tih Hachhek bialtu MLA hian a sawi. Kum khat chhunga ZPM sawrkarin Hachhek bial tana a tih langsar zual 5 sawiin, “Mizoram chhung Phuldungsei khuaa Mizo 85-te ration card Mizoram Adhaar nena online-a link thlap tawh an cancel a, an YMA Branch president leh a chhungte pawh an tel. Health Clinic Centre 11-a nurse thawklai tihtawp vek, SEDP zirtirtu ban vek, zirtirtu leh sawrkar hnathawk ban leh transfer, work supervisor lem in vilik em emte hi an thiltih awmchhun a ni,” a ti.