MJA Lunglei-in conference hmang

MJA Lunglei-in conference hmang
Mizoram Journalists’ Association (MJA) Lunglei District chu Nilaini khan Lunglei Press Club-ah kum 2025 atana inhlanthar pahin annual conference an hmang a. Lunglei District Information & Public Relations officer C Lalhruaitluanga’n a hmanpui.
DIPRO chuan kum kaltaah I&PR leh MJA ten thawhhona tha tak an nei chu lawmawm a tih thu sawiin, kum tharah pawh thawhhona tha vawnhim zel a nih a beisei thu a sawi a. MJA member-te chu chanchinbu tihchhuah kawngah leh thuthar thehdarh kawngah hma sawn tuma tan la tura chahin, digital media thang zel mila inherrem tum turin a chah. Social media-a thudik tawk lo thehdarh do let thei ber leh mipui leh sawrkar pawhin thulakna rintlak bera an la neih chu journalist-te an la ni reng tih sawiin, tha taka sawrkar thawhpui a, ram leh mipui tan thahnem ngai taka thawk zel turin a chah a ni.
District MJA president Laltlanthanga pawhin MJA member-te chu social media thangchak tak karah mahni zawnah theuh tan la turin a chah a. Mahni hnaa rinawm tur leh journalist hna zahawmna vawngnung zel turin a chah a ni.
Annual conference-ah hian 2024 December 2-a chatuan ram pan ta, MJA Lunglei District member Johan Lalhmunmawia, DDK stringer sunna hman a nih bakah rorel inkhawm neih a ni.
MJA Lunglei District hi “Lunglei Journalist Association (LJA)” tiin kum 1972 khan din niin, 2006 December 1 atang khan “MJA Lunglei District” tiin kalpui tan a ni a. Tunah hian member 18 an awm a ni.