Hnamro Chawisang Pawl-in lawm

Hnamro Chawisang Pawl-in lawm
Dawrpui Jail Venga Mizo Hnamro Chawisang Pawl chuan Zirtawpni khan an kum 50-na an lawm a. Bialtu MLA, minister B Lalchhanzova’n a hmanpui.
Hnamro chawisang pawl thil tum leh a din chhan chu ropui a tih thu minister hian a sawi a. An hmalakna chu thangtharte pawhin an la zirchian duh a rin thu sawiin, “Hmingthat mai hi chu a awl a, rei daih hi a pawimawh zawk. Nun Siamtha Pawl tih hming a put ang ngei hian, Mizo Hnamro Chawisang Pawl a nih hnu pawhin, a hming hmasa hi a la keng tel zel tur a ni,” a ti.
Hnamro Chawisang Pawl president K Rothanga sawi danin, an pawl hi 1975 January 4 zanah Jail Veng nu leh pa leh thalai kalkhawmten ‘Nun Siamtha Pawl’ tih hmingpu-in an din a. 1977 January 28-ah Mizo Hnamro Chawisang Pawl tia thlak a ni. 1976 March 11-ah membership fee an khawn tan a; kum 1985-ah sawrkarah an in-register a ni. Tunah hian chhungkaw member 150 vel an awm mek.
Hnamro Pawl din chhan sawiin, Dawrpui chu zu leh sa bakah hmeichhe buan chak lo, ‘KS’ tia sawite fuankhawmna hmunpui an nih avangin, thenfai hna thawk tura din a ni a. Tunhnu zelah pawh Dawrpui Local Council leh Dawrpui Thalai Pawl nen tanghoin hemi kawngah hian hma an la thin tih a sawi.
Hei bakah hian Zonun zemawi, aia upa zah leh tlawmngaihna thangthar nuna chawinung zel tura hma la in, veng mamawh electric eng, step leh kawng tha, tuikhur siam, vantlang tana tui connection leh thil dangah sawrkar puihnain hma an la thin tih a sawi bawk.
Mizo Hnamro Chawisang Pawl golden jubilee hi ruai nena lawm a nih bakah zanlamah hun hlimawm hman zui a ni.