CYMA-in 8th Schedule-a Mizo tawng dah duh

Central YMA chuan India danpui hnuaia 8th Schedule-ah Mizo tawng dah ve an duh tih Mizoram larsap hnenah an thlen a. Larsap hmu ve tho Mizo Zirlai Pawl chuan free movement regime leh ramri hung an duh loh thu an thlen. Mizoram larsap Gen VK Singh (Retd) chuan Mizorama tlawmngai pawl lian ber Young Mizo Association (CYMA) hruaitute, Mizo hmeichhe hlang member awmna NGO lian ber Mizo Hmeichhe Insuihkhawm Pawl (MHIP) hruaitute leh Mizorama zirlai pawl intelkhawmna lian ber Mizo Zirlai Pawl (MZP) hruaitute chu Thawhtanni khan Raj Bhavan-a lengah sawmin, state hmasawnna atana pawimawh leh tul hrang hrang a sawipui.
Larsap hmuhnaah hian Central YMA hi an president Lalhmachhuana hoin office bearer dang 5 an tel a. NGO Darpan portal chungchanga harsatna an neih siamrem a nih theihnan hma laksak turin an ngen. India Constitution 8th Schedule-a Mizo tawng dah ve a nih theihna atan hma lakpui tura ngenin, hemi chungchanga Prime minister hnena lehkha an siam chu thehluh sak turin an ngen nghal bawk.
Larsap chuan Mizo khawtlang nunah YMA pawimawhna leh a hnathawh a lo hriat tawh thu sawiin, Mizoram leh Mizo khawtlang nun siamthat kawnga theihtawp chhuah zel turin Central YMA hruaitute a sawm.
An inkawmnaah hian Mizoram leh state dang inkalpawhna kawngpui tha hleithei lo chungchang sawiho a ni a. Larsap hian Mizorama a awm chhunga inkalpawhna kawngpuiin hma a sawn theihnan tan lak a tum thu leh a hmunah tlawh a tum thu a sawi. Ruihhloin Mizo khawtlang nun a run nasat dan leh thalai tam tak ruihhlo bawia an tan dan, ruihhlo do kawnga YMA hmalak dan leh sawrkar nen thawhho dan sawi a ni bawk.
Larsap chuan Central YMA a chet chuan Mizo society-ah thil tam tak a tih theih tih sawiin, mipui tanhona a pawimawh tih a sawi a. Hun remchangah Central YMA office tlawh a tum thu a sawi a ni.
MZP Gen. Hqrs hruaituten an kawmnaah Free Movement Regime (FMR) leh ramri chungchanga MZP ngaihdan an hrilh a. Hnam khat, chi khat, unau ramriin a thendarhte insuihkhawm chu MZP hmathlir a nih mek lai a, zalen taka inkalpawhna tihtawp a ni leh ramri hung tum chu an duh lo tih an hrilh. Theih ang anga hma lakpui turin larsap hi ngenin, Union Home minister hnena hemi chungchanga MZP lehkha thawn tur an hlan nghal.
MZP hruaitute chuan Mizo zirlaite tan study tour buatsaih sak turin larsap hi an ngen a. Railways hnuaia hnaruakah Mizo thalai a tam thei ang ber an luh theihnan, Mizoramah exam center dah a nih theihna atan hma laksak turin an ngen bawk.
Larsap chuan MZP-in zirlaite hmakhua ngaia a hnena an thil thlen chu theih ang anga a bawhzui tur thu a hrilh a. Kawng hrang hrangah thawhpui tura sawmin, zirlaite ruihhlo laka an fihlim theihnan theihtawpa hma la turin a fuih. Hemi kawnga hma an laknaah a inhawng hle tih sawiin, Mizorama ruihhlo hluar lutuk chu a vei hle tih MZP hruaitute a lo hrilh a ni.
MHIP Gen. Hqrs. pawhin larsap hi an president Ngurmawii Sailo hoin an kawm a ni.