Tui chhunga khawsa rei record siam

Tui chhunga khawsa rei record siam
German aerospace engineer Rudiger Koch, kum 59, chu tui chhungah ni 120 chhung a khawsa a, Guinness World Records-in tui chhunga khawsa rei thei berah a puang.
Rudiger hian tui chhunga a chen nan hian suqare meter 30 a zau, tui chhung, meter 11 a tukah a buatsaih a, tui chhunga a in chhungah hian ni 120 chhung a inkhung ta a ni. A hmaa hetiang record chu American Joseph Dituri siam niin, ani hi ni 100 chhung tui chhungah a khawsa ve thung.
Rudiger chuan, “Adventure danglam tak a ni a, han chhuahsan pawh a khawharthlak zawk lek lek mai. Tui chhunga ka hun hman te nuam ka ti hle a ni. A awmdan hi sawifiah thiam chi pawh a ni lo, in tawn ve loh chuan inhrethiam lo ang,” a ti.
A tui chhung inah hian khum, inthiarna tur, TV, computer leh internet bakah exercise bike thlengin a dah ve thlap a ni. Panama atanga hmarlam, lawnga minute 15 vel kala tui chhungah awmin, pawn lam atanga an kal pawh theihna tur, eitur an pek theihna tur leh doctor-in a tlawh theihna tur spiral leihlawn a awm a, electricity atan pawnlamah solar panel a dah a, backup generator a nei bawk.
A tui chhung in, capsule-ah hian kil hrang hranga camera pali dahin engtik lai pawhin thla a la reng a, pawn lamah a chhuak lo tih finfiah nan hei hi a hmang nghal a ni.