Minister leh MADC hotute inkawm

Minister leh MADC hotute inkawm
Health & Family Welfare minister Lalrinpuii chuan Thawhlehni khan Mara Autinomous District Council a tlawh a, chief executive member (CEM) M Laikaw leh a thawhpuiten an lo dawngsawng.
Health minister chuan MADC hotute chu Siaha district mipui tan theihtawp chhuah puiah a sawm a. District chhunga a department hnuaia project hrang hrang hmalakna sawiin, hmasawnna rotling thlentu a nih ngei a beisei tih a sawi. An mamawhte theihtawpa ngaihven pui tur leh hma lak pui zel a tum a, project an thehluh tur pawh a bawhzui pui zel tur thu a sawi a ni.
CEM chuan kum 2025-a minister lo tlawhtu hmasa ber a nih avangin lawmthu a sawi a. Ram leh hnam tan tha taka thawhho puiah a sawm. Siaha district-in a mamawh hrang hrang a sawi a. District Hospital-a doctor leh nurse indaih loh thu, ICU function theiloa a la awm thu, Urban Public Health Centre, Siaha-a nursing school, MCHP O-pi (Drop in Centre) leh de addict centre/ rehabilitation centre bakah tul leh pawimawh dang a sawipui. Siaha district tan rah tha chhuahin hmasawnna tluantling a thlen ngei a beisei tih a sawi bawk.
CEM bakah executive member-te leh Member of District Council-te nen inkawmin, Siaha district hmasawnna tur an rel ho a, hmasawnna rualrem taka sem a nih theihnan tul leh pawimawh an sawiho a ni.