Indian Wells: Raducanu leh Murray chak

Indian Wells: Raducanu leh Murray chak
Indian Wells hmuna tennis tournament ngaihhlut hlawh BNP Paribas Open-ah Ningani khan Briton pahnih Emma Raducanu leh Andy Murray-te chuan an tumpui ve ve hnehin second round an lut.
World number 77-na Raducanu hian 2022 Australian Open-a a ngam loh Montenegri Danka Kovinic lakah phuba lain 6-2 6-3 hnehna a chang a; kum 20 mi Raducanu hi California chhim lam thlaler khawpuiah hian eng dinhmunah nge a din leh dawn tih sawilawk a har a, nikum khan a banrek hliam avangin season a khar hma hle a, Indian Wells ni sa rumrut hnuaiah erawh mittlung takin bul a tan ta phawt a, second round lamah Poland nula Magda Linette a hmachhawn leh ang.
Hnehna a chan hnuah Briton chuan a hlim hle thu sawi chungin a service break sak a nih hnuah thil a harsa tih a sawi a, rilru lama pau-khauhna a pawimawh tih a tarlang tel.
Ningani hnehna kha kumin January thla laihawl Australian Open-a Coco Gauff a hneh loh hnua 2021 US Open champion chak leh vawikhatna chiah a ni.
Tleirawl qualifier mai ni chunga US Open-a a rawn champion nawlh hnu khan Raducanu hian fitness lamah harsatna a tawk chho deuh reng a; banrek na bakah tonsil na avangin karhmasa mai pawh khan Austin khaw tournament atangin a inhnukdawk a, mahse, British number one hian Indian Wells-ah tha takin bul a tan a, 62nd-ranked Kovinic lakah bul tan fuh lo zawk ni mah se a insiamtha thuai a, harsatna lian tawk loin kum 28 mi lakah hnehna nuamsa a sualchhuak thei.
Ningani hmeichhe singles first round inkhel danga Grand Slam champion tawh ve ve intumah Sofia Kenin chuan 6-4 6-1-in Sloane Stephens a sawp a; a chipui American Madison Brengle leh Czech nula pahnih Marketa Vondrousova leh Karolina Muchova hnungzuiin second round a lut.
Qualifying event final round-a a tlawm zet hnua inhnukdawk Tamara Korpatsch aia dahluh Dalma Galfi pawhin Australian Open runner-up lai lo ni ve tawh Danielle Collins lakah beisei loh 6-4 6-4 hnehna a sualchhuak ve bawk.
Mipa lam ve thung
Indian Wels men’s draw lamah Andy Murray chuan a tumpui Tomas Etcheverry laka 6-7 (5-7) 6-1 6-4 hnehna changin second round a lut a; Briton ve bawk Jack Draper pawhin minute 55 lek chhungin Switzerland player Leandro Riedi chu 6-1 6-1-in a sawp a, a chipui Dan Evans a hmachhawn leh ang.
Scot Murray hian a khel bawr zai a nih hnuah pangngai takin a career a chhunzawm leh mek a; kum 23 leka upa Argentine laka darkar thum leh minute 12 chhunga hnehna a chan hram hnuah kum 35 mi chuan inkhel harsa tak a nih thu a sawichhuak.
British world number one hlui Murray hian vawiin second round lamah Spain world number 17 Pablo Carreno Busta a tum leh dawn a, Grand Slam-a vawithum champion ve tawh Murray hian hnehna chan chhunzawm turin a riltam huam huam tih a sawilang tel.
Ningania Briton chak dang left-hander Dan Evans khan kumin Australian Open-a Rafael Nadal a hneh loh hnua a vawikhatna’n khelmual a lut a, Indian Wells-a bul a tannaah a ke hliam buaipui thin khan a tibuai ta lo a, awlsam takin 135th-ranked Riedi a hneh.
World number 56-na Draper-a tum leh tur 24th seed Evans hi ATP Masters event-a a debut nghakchhuak ve chiah Riedi ai chuan khirh zawk hle tura ngaih a ni.
Kum 32 mi Evans hian Californian desert tournament-ah first-round bye a chang a, vawiin hian Davis Cup lama team-mate ni mek pahnih hi a vawikhatna’n an inhma-chhawn dawn.
Mipa singles inkhel dangah Switzerland three-time Grand Slam champion Stan Wawrinka chuan kum li zet California tourna-ment a khelh loh hnuin hnehna nen bul a tan ve leh a; Australia player Thanasi Kokkinakis pawhin top seed Carlos Alcaraz hmachhawn thei turin first round a paltlang ve bawk.
2019 champion Dominic Thiem erawh French veteran Adrian Mannarino chuan 4-6 6-4 7-6(5)-in a hnawtchhuak thung.
Nilaini khan first round-ah tho Brandon Nakashima chuan veteran John Isner hnehin first round a lo paltlang ve tawh bawk.
Rising American Nakashima hian Isner lakah 7-6(7) 6-3 hnehna changin, second round-a Daniil Medvedev hmachhawn theiin beisei loh result a hlawhchhuak.
Kum 21 mi Nakashima hi big-serving Isner lakah rinkai lozawk ni mah se Kansas City Chiefs quarterback Patrick Mahomes leh a chhungte hmuh laiin hnehna a chang nawlh a, kum 2018-a a tour debut nghahchhuahna Indian Wells-a second round a lut chuan a tiphur takzet tih inkhelh banah a sawichhuak.
Second round-a amah lo nghaktu world number six Medvedev hi title pathum la zawn mek, match 14 chak zawn lai a ni a, Russian em em hi chu paltlang zo lo tura ngaih a ni!
Nilaini first round inkhel dangah Australian Jordan Thompson pawhin Frenchman Gael Monfils lakah 6-3 6-1 hnehna awlsam changin, Diego Schwartzman pawhin a chipui Argentinian Federico Coria chu 6-1 6-2-in a sawp ve bawk.
Tarlan tawh thin angin, Indian Wells hi Grand Slam tournament tih loha tennis tournament lianberte zinga pakhat a ni.