Piang leh thi chhinchhiahtute inzir

Piang leh thi chhinchhiahtute inzir
Registrars of Births and Deaths (RBD) tan Civil Registration System chungchangah Nilaini khan Kolasib leh Khawzawlah annual training neih a ni a. Directorate of Economics & Statistics atangin an hmanpui.
Mizoram pumah Births & Deaths Registration unit 884 a awm a, heng zinga 116 hi damdawi in behchhan (institution) niin, a dang 768 hi veng/ khua pual (local) an ni. Unit tinah hian Registrar of Births & Deaths (RBD), sawrkar hnathawk mi pakhat zel an awm.
Births & Death Registration hi damdawi in behchhan RBD 116 hian 2024 November 11 atang khan online registration kalpuiin, piang leh thi hnenah digitized certificate zel an pe chhuak thei tawh a. Hetiang hian veng/ khua tana RBD 768 hian kumin February 1 atanga online tegistration ti a, digitized certificate zel pe chhuak thei turin training hi neih a ni.
Kolasib-a training neih hmanpuitu district bawrhsap Robert C Lalhmangaiha chuan Mizoramah certificate lem avanga harsatna an tawh thin thu sawiin, birth leh death certificate pechhuaktu an nih angin dik leh fel taka hna an thawh chu ram himna a ni a, sawrkar inrelbawlna fel takin a kal phah tih a sawi. Mizoram leilung fa diktakte certificate-a an chuan theihnan tan la turin a chah bawk.
Kolasib district huamchhungah hian damdawi in behchhan RBD 8 leh veng/ khua behchhan RBD 37 a awm a ni.
Khawzawla hmanpuitu district bawrhsap K Vanlalthiana chuan, piang leh thi chhinchhiah hna chu danin a phal loh anga thil tih tum manchhuahna atan thil pawimawh tak a ni, tiin, rilru inhawng taka tih dan dik zawm turin a chah a ni.