LA ram kang sik leh sa inthlak nghawng chhuahah ngai

LA ram kang sik leh sa inthlak nghawng chhuahah ngai
Mi thiamten an zir chiannaah tun hnaia Los Angeles-a kangmei chhuak chu khaw lum leh boruak ro piah lamah sik leh sa inthlak nasa chu a ni tih an finfiah.
World Weather Attribution chuan sik leh sa awm danin a nghawng chhuah a nih theiha chu 35% chuang niin an sawi a, khawvel pumah khaw awm dan uchuak tak tak chu sik leh sa inthlakin a nghawng chhuah niin an ngai.
Zir chiannaa an thil hmuh ziaktute chuan LA ram kang hun (season) hi ruahin thelh mah se a rei zawk tih an tar lang.
Scientist-te chuan ram a kan chhan hi thil tam tak awm thei mah se khaw lum zel chuan LA hi ram a kan mai duhna hmunah a chantir niin an sawi.
“Sik leh sa inthlak nasa hian LA ram kang nasat leh sat loh hi a hril thui hle a ni,” tiin zir chianna ziaktu hotu, Dr Clair Barnes, Imperial College London chuan a sawi.
“Khawkhengin thlasik a tina zual a, Santa Ana thli a lo thawh khan a tira mei chhe tê pawh nasa taka punlun theihna remchang tak a siam ta a ni,” a ti.
Santa Ana thli hi a na hle a, Colifornia atanga khawchhak leh hmar lam hawia vaukam pana thli thawk nan, kangmei a timankai chak zual duh hle a ni.
January thla tir lama ram kang inman kai chak takah khan mi 30 vel thiin chenna in 10,000 chuang a chhia a ni.
Khawvel huap pawl, World Weather Attribution (WWA) chuan sik leh sa leh ram kang nasa tak inzawm theihna hi an zir chiang a ni.
LA kangmei chhuah lai kha a lumin a ro hle a, hetiang dinhmun hi kum 17 dan zela thleng thei niin an sawi.
Zir chiangtute hian ram kan chhan dang pawh dapin kangmei a chhuah duh hun chhung rei leh rei loh pawh an en a. Kum 1850 vela khawvel pum a lum dan atanga an chhutin ni 23 vel laiin ram kan mai duh hun hi a rei tawh zawk niin an sawi.
Ram a kan chhan lian tak dang leh chu khawkheng niin an sawi a. LA huam chhungah hian October leh December inkarah mihringin nasa taka fossil fuel an hman hma aiin a let 2.4 velin khua a ro zawk niin an sawi.