YMA leh Police-in dan loa tawlh ramdang kuhva man

YMA leh Police-in dan loa
tawlh ramdang kuhva man
Champhai district Khawbung ram chhungah Vanzau YMA leh Mizoram Police tangdun chuan ramdang kuhva dan loa Mizorama phurh luh an man.
Thudawn danin, Nilaini chhun khan Khawbung ram chhung Tuiaw leiletah kuhva tawlhru truck pahnih chu YMA Vanzau Branch leh Dungtlang Police-ten an man a, duty an indah meh laiin Thawhlehni zan khan kuhva phur lirtheiin an khawchhung an paltlang tih hria in, Dungtlang Police Station an hriattir nghal a, Vanzau leh Khawbung inrina, Tuiaw luia leiletah nangchinghin truck pahnih hi an man a ni.
Lirthei hi Champhai atanga Aizawl lam pan niin, lirthei khalhtute hi Lalawmpui, Vaphai nia insawi leh Lalchhuanpuia, Bungzung nia insawi an ni a. Champhaia Customs hnenah an hlan.
YMA Vanzau Branch hian an khaw ram chhungah dan loa kuhva phur lirthei kaltlang an phal lo tih sawiin, heng lirthei hian kawngpui a tichhe nasa tawh a, kumin January 29 atang khan duty indahin an veng a, phur tlang lui an awm a, an man a nih chuan thuneitute hnenah an hlan zel dawn tih an sawi a ni.