Hriselna tichhe thei boruak tha lo laka invenna lam zirtir

Hriselna tichhe thei boruak
tha lo laka invenna lam zirtir
National Health Mission hnuaia National Programme on Climate Change and Human Health (NPCCHH) buatsaihin Nilaini khan Aizawl East & Aizawl West district huamchhunga Health & Wellness Centre hrang hranga health & wellness officer leh medical officer (AYUSH) te tan midang la zirtir lehchhawng turte zirtir an ni.
Training-ah hian sik leh sa leh boruak inthlakin hriselna a nghawng dan chungchang, mipuiin kan invenna tur leh boruak /leilung tichhe lo tura kan tih tur hrang hrang inzirtir a ni.
Hmanpuitu National Health Mission mission director Dr Eric Zomawia chuan NHM chu mi zawng zawng ban phak niin, mitin chhawr theiha man tlawm zawka inenkawlna tha pe a, hriselna kawnga hma latu a ni tih a sawi. Hospital hrang hranga a thlawna inenkawlna tam zawk a awm theihnan hma lak a ni a; Sub-Centres, Health & Wellness Centres, Primary Health Centres, Community Health Centres leh Urban Primary Health Centres te hospital lian zawk pan ngai loa changtlung leh tha zawka thuamthat a ni tih a sawi.
Mizorama damdawi in hrang hrang 19 chu India ram damdawi in tha bika thlan a ni tawh tih a sawi a ni.
NHM NPCCHH state nodal officer Dr Vanlalrengpuia Chinzah chuan leilung, sik leh sa inthlakin mipui hriselna a nghawng nasat dan a sawi a. Climate change chu sawrkar hnathawkte chauh niloin mipuiin tangruala kan hmachhawn tur thil a ni tih a sawi a. Sawrkar hospital leh inchhungkhura boruak chhia chi hrang hrang siam thei titlem tur zawnga hma lak a, tawih thei lo bawlhhlawh leh vawi khat hman plastic titlem tura hma lak a ngai tih a sawi bawk.
Training-a tel health & wellness officer leh medical officer-te hian anmahni centre theuha ASHA leh Jan Arogya Samiti member te an zirtir chhawng ve leh dawn a ni.