MBBA D League Screening 2025 Table chung berah Chhinga Veng BC (Nuam, nuam…)

MBBA D League Screening 2025
Table chung berah Chhinga Veng BC
(Nuam, nuam…)

January ni 28, 2025 atanga tan D League chu a hmawrbawk chhoh a ni ta a, team pasarih zinga point hmu sang ber club pathum – Chhinga Veng BC, Mission Veng Hotshots leh Tuikual South BC-te’n MSL 11, 2026 an khel dawn ta.
League round-ah Chhinga Veng BC-in point an hmu sang ber a, anmahni hnaih bertu Mission Veng Hotshots nen February ni 7, Zirtawpni dar 1:30 pm hian Hawla Indoor Stadium Republic Vengthlangah final an khel zui ang.
Chhinga Veng BC hian Mizoram basketball huanga inelna sang bera champion nomawi tum li zet Zarkawt BCA lo chawipui tawhtu, Dawrpui tlangval Afela chu coach atan ruaiin, ani hian kum 2021-a team indin tha thar leh Chhinga Veng BC hi MSL a hruai thleng nghal a ni.
Mizoram Premiere League (MPL), Mizoram Pro Volleyball League, Mizoram Cricket League leh badminton inelna huangahte Chhinga Veng hian nomawi an chawi vek tawh.
‘Nuam, nuam, nuam’ tia zai dual dualin fam Lalrinpuia ho ngei khan an vengchhung hian Mizoram infiamna hi an lo awp tawh a ni.
Hetia Mizoram Super League (MSL) khel tura an inbeng tling leh ta hian khawtlang tangrual leh inlungrual an nihzia a nemnghet chiang hle.
An veng pa mi thilphal Dr. Jerry Pautu inpekna te, thawm daih lai ber pawha club lo vil nung tang tangtu Jonathan, Ronald, Akima, Joel, Duhtea, Mama leh an khawtlang hruaitu zinga tarlan hmaih theih loh Lalmuanate hian MSL zinkawng hi a khirh leh hautakzia an hrechiang hle awm e.
D League final en tur hian vengchhung mipui an thawkchhuak huk ngei ang.
MSL kai thar zingah Mission Veng Hotshots hian an veng mipui thahrui leh tawiawmna an mamawh hle. Anni hi MSL team tha ber pawl an ni reng thin a, vengchhung tanrualna nen hmathlir phurawm tak an neih thiam a tul hle ang.
Club neitu – Paul, Amuana leh Mamatea bakah an thawhpui te, head coach Lana leh players lam chuan an hna an tlin tha thin hle a, an hnungah hian veng mipuite’n an thlawp a tul.
D League final hi tawiawmtu an neih leh neih loh fiahna hmasa a ni nghal pang ang.
Mizoram basketball chan-chin sawi apianga thlawptu leh tawiawmtu nei tha lawrlak Tuikual South BC-in MSL an khel leh tur hi chanchin ngaihnawm fal bik a ni chiang ngei mai.
Phengphehlep hla nen an veng mipui rawn thawkchhuak leh tur mawlh hi a nghahhlelhawm mang e.
An club hi engtiang takin nge an insiksawi chhoh zui ang tih hi zawhna lianpui a ni.
Zofate hian tuipuirala hnam dang inkhel enin zan khawtairek thleng thleng kan meng a, kan tel lo pawha nghing eih lo turte lama kan mit a fuk thup lai hian tualchhunga kan thalaite chetvelna kan hmuhkan leh si chuan kan hnam hi a thang ngai lovang.
Infiamna huang hrang hranga hlawkna um miah lova kan thalaite tana insengso thin mi thilphal leh inpete hi chawimawi leh ngaihsan an phu hle.
He rilru nen hian D League final lam hawi ang u hmiang…