LC/VC inthlan tluang takin nei
Mizoram district 9-a village council leh Aizawl leh Lunglei Municipal-a local council inthlanpui chu February 12 tluang leh ralmuang taka neih zawh a ni a. Buaina liantham thlenna a awm thu hriat a ni lo.
Vote hi zing dar 7.00 atanga tlai dar 4.00 inkara thlak turin State Election Commission Mizoram chuan a ruahman a, tlai dar 4.00 a vote thlak fel hman lo, polling area-a vote thlak tuma lut tawh an awm nual avangin tlai dar 4.00 a vote tlak dan kimchang pawh hi siam fel mai theih a ni ta lo a ni. Vote thlak zan, dar 7.00 atangin vote tla hi chhiar nghal a ni a. He chanchin buatsaih lai hi chuan result hriat tur a la awm lo. A tam zawkah chuan nizan lam khan vote tla hi chhiar zawh hman a ni ang.
Tun tumah inthlanpuiah hian district 9-a VC 544-a bial 2416 ah inthlan a ni a, hen zinga bial 613 hi hmeichhe tana hauh bik a ni. Bial 2416 chuh tura hming pe lut mi 6829 awmin, candidate 5178 hi tu pawhin an chuh theihna biala chuh tur an ni a, hmeichhe tana hauh bik bial chuhtu 1651 an awm.
Aizawl Municipal Corporation huamchhungah hian LC 87 awmin LC member 575 an awm a, bial 418 chu duh duh chuh theih niin bial 157 chu hmeichhe tana hauh bik a ni. AMC huamchhunga LC inthlan chuhtu hi general seat-ah 1211 leh hmeichhe tana hauh bik chuhtu 448 an awm a ni.
Lunglei Municipal Council huamchhunga LC 24-ah bial 148 awmin, a duh duh chuh theih bial 110 leh hmeichhe tana hauh bik bial 38 a awm. General seat chuh theih bialah candidate 309 awmin hmeichhe bial bik chuhtu 108 an awm a ni.
VC inthlanpui hnuhnug ber, kum 2020 khan vote tla hi za zelah 75.82 a ni a, Mizorama tualchhung inthlana hmeichhe tana seat hauh bik awm tan kum, 2015 khan VC inthlanah vote zaah 67.42 a tla a ni.
February 12-a local council/ village council inthlan neih zawh takah Nokungi (107) College Veng Aizawl chuan polling booth ah vote a la thlak thei a. MPF duty-ten vote thlakna hmunah hian an hruai a ni. State Election Commission Mizoram-in a hriat theih chinah tun tuma vote thlaktu upa ber a ni. Tun VC/LC inthlanah hian kum upa leh chet harsat bikte tana an ina kalchilha vote thlak tir, ‘home voting’ tih a ni lo.