Thla 10 chhungin HIV kai hmuhchhuah thar 1669 awm

Tunhnai thla 10 chhungin Mizoramah HIV kai hmuh chhuah thar 1669 an awm a, heng zinga 1015 hi inpawlna atanga kai an ni.
Mizoram State AIDS Control Society leh AIDS Healthcare Foundation (AHF) buatsaihin Ningani khan Aizawlah International Condom Day hman a ni a, ‘Generation C Programme’ hawn nghal a ni. Hmanpuitu MSACS project director Dr Jane R Ralte chuan, tunhnai thla 10 chhunga HIV hrik kai hmuhchhuah thar leh hemi atanga invenna him tel loa sex hman atanga kai zat hi a sawi a. Condom chu sex leh hurherhna lam chawilarna niloin, sex atanga inkaichhawn theih natna HIV leh a dangte laka invenna hmanraw tha a nih vanga hman mamawhten an hman ngei theihnana sawi uar an ni tih a sawi.
International Condom Day hman ruala Generation C Programme hawnnaah hian two wheeler taxi khalhtuten anmahni hmangtute tana condom lak mai theihna tur pai-na jacket sem a ni a, khawpui chhung hmun remchang laiah condom lak mai theih tur chhawp tura ruahman a ni bawk.
Khawvel puma HIV/AIDS a darh lohna atana lama hmalatu lian ber AIDS Healthcare Foundation (AHF) India Cares County program director Dr V Sam Prasad pawhin Mizorama HIV darh zel tur ven kawngah hnathawh phurawm a tih thu sawiin, chona lian tak a ni bawk tih a sawi a ni.
Hemi kawng beihpui thlakna, ‘Love Brigade Campaign’ hi kum 2020 atanga kalpui tawh niin, tun tum a thawhhnihnaah hian Aizawl Two-Wheeler Taxi Association nen tangdunin two wheeler taxi khalhtu engemawzat hnenah condom jacket hi sem a ni. Love Brigade Campaign thawhhnihnaah hian Aizawla auto driver association te hnenah HIV chungchang inhrilhna hmanrua dahna tur seat cover sem a ni dawn a ni.
MSACS chhinchhiah danin, Mizoramah tun thlengin HIV kai mi 31676 hmuh chhuah an ni tawh a, ART Centre-a inziaklut 26364 awm tawhin, hriat theih chinah mi 5332-in HIV/AIDS an thihpui tawh a ni.