Santos-a goal thun nghal Neymar

On Feb 18, 2025 4 0

Santos-a goal thun nghal Neymar
Arab club chhuahsana a naupan lai team Santos a zawm leh hnuah Pathianni khan Neymar chuan 3-1-a Agua Santa an hnehna game-ah Brazilian club tan penalty atangin goal a khung nghal.
Kum 33 mi hian sum tam tak hlawh turin Saudi Pro League club Al-Hilal zawm mah se hliam avangin a inkhel thei mumal ta lo a, inbiakremnaa Saudi Arabia club a chhuahsan hnuin a chawrchhuahna Santos chuan lawmtakin an senglut a, thla 16 chhung teh meuh goal a thun tawh loh hnuah goal lawm tur a nei ve leh ta a ni!
Neymar chuan, “Ka inkhel leh thei hi ka hlim takzet a, hma pawh ka sawn leh tawhin ka hria. Hliam ka thawhsan hnua ka game vawili khelhna chauh a la ni a, taksa lamah pawh 100% chu ka la ni pha lo deuh a, mahse, ka tha zel a ni.
“Goal ka thun leh thei khan min tiphur em em a, ka goal kha fans leh ka chhungte tan ka hlan e,” a ti.
August 2023 khan Al-Hilal chuan pound maktaduai 77.6-in Neymar hi Paris St-Germain atangin an leichhuak a, mahse, Arab ram a thlen hnu lawkah khup hliamin a tlakbuak a, Saudi Pro League club tan match sarih chiah a khelhsak thei!
Neymar hian kum 2009 khan rawlthar kum 17 mi lek ni chungin Santos tan senior debut a nghakchhuak a, he club tana a hun hmasaah match 225 atangin goal 136 a thun tling a, assist ngawt pawh vawi 64 a siamchhuak tling.
Brazil forward hi Barcelona-in kum 2013-a pound maktaduai 48.6-a an lakluh hnu khan khawvela footballer thaberte zinga pakhatah a inhlangkai a; Nou Camp club tan trophy pariat la tlingin, chu’ng zingah chuan Champions League title pakhat leh La Liga title pahnih telin, kum 2017 khan Paris St-Germain chuan world-record fee (£200m)-in an senglut ta hial a nih kha!
Paris-ah trophy 13 la tling leh mah se manager Luis Enrique duhsakna a dawng zo ta lo a, Saudi Arabia ramah chona thar a hmachhawn a; Al-Hilal a zawm hnu lawkah Brazil tana goal khung hnem ber ni reng thin Pele record dinglai khum turin ram tan goal 78 a thun tling a, mahse, October 2023 khan a khup a tina ta hlauh a, tun thlengin ram tan a inkhel leh ta rih lo.