Sawhthing lei vek dawn
Media & publicity department, ZPM Gen Hqrs Aizawl chuan, ZPM Legislature Party nimina thutkhawmnaah Pu Lalduhoma chief minister chuan, sawhthing chingtuten an thar ang ang te a bo a bang awm loa an hralh vek tur thu a sawi, tiin thuchhuah an siam a.
Hetih lai hian, sawhthing hralh chungchanga nimina video viral pakhatah chuan, sawrkarin a thawhkhatna atana sawhthing a lei turah, chawhrualin sawhthing chingtu pakhatin quintal khat bak hralh thei lo tur anga sawina a awm a, hei hi Hnahthial district chhunga collection centre pakhat huam chhunga awmte dinhmun nia tarlan a ni a. Hei bakah hian, khua 6 atanga sawhthing lei tur ruahman zat chu quintal 90 chauh a nih thu te, chu chu sem rualin sawhthing chingtu chhungkaw pakhatin sawhthing kg hnih khat bak an hralh thei dawn lo niin sawi a ni bawk a. Tun dinhmunah collection centre 62 siam a ni a, Hnahthial district ang tho hi district danga collection centre atanga sawhthing lei dan tur ruahman hi a ni ve hlawm ang em? tih chu zawhna awm thei a ni.
Eng pawh ni se, ruahmanna kal mek a ni a, sawhthing lei a thawhkhatna chu a enga pawh chu lo ni se, February ni 20 leh March ni 20 inkara sawhthing lei tur hisapin sawhthing chingtu tam tak chuan sawhthing an lo cho lawk a, mahse an beisei angin an sawhthing chawhsate an tiral thei dawn lo niawm tak a ni.
Nimina ZPM Legislature Party thutkhawmnaa chief minister sawi dan hi chuan, sawhthing chingtuten an thar ang ang te a bo a bang awm lovin an hralh vek thei dawn nia sawi a ni a. Chuti a nih chuan, a thawhkhatnaa sawhthing tiral thei lote pawhin a thawh hnihna emaw, a thawh thumnaah emaw, an sawhthing thar ang angte chu an hralh thei vek dawn tihna a nih hmel a, tuna rilru hah taka awm mek sawhthing chingtute tan chuan thawk huaina tur niin a lang.
Ram hruaitute thusawi leh, a kaihhnawih mipuite inkarah hian ‘gap’ zau tak a awm thin erawh thil pawi tak niin a lang. Tuna chief minister-in ‘a bo a bang awm lovin’ tia a sawi hi sawhthing chingtute hian ringhlel lovin rilru hahdam takin lo nghak thei se a duhawm hle a. Chutih laiin, hlauhthawnna nei chunga tun thlenga sawhthing chingtute an la awm erawh, sawrkar lam hian chiang zawkin hrilhfiah leh thei se a duhawm hle a ni.