Zophaia IR post kawng siamna tur Mizoram sawrkarin a ti lapse

Zophaia IR post kawng siamna
tur Mizoram sawrkarin a ti lapse
Bairabi MZP chuan Zophaia IR Post panna kawng ruahman tawh chu tun sawrkarin a ti lapse niin a sawi a, thuamtha tur leh an mamawh ang tih sak turin sawrkar an ngen.
MZP Sub Hqrs. Bairabi hian tunhnai khan 1st IR Post Zophai Bairabi dinhmun enfiahin an tlawh a, an mamawh leh harsatna tawh hrang hrang an sawiho a. Bairabi 1st IR Post panna kawng hi a zimin a chhe hle a, kawng zau zawk an mamawh a, IR pawh hian an thawmtha thin tih MZP hian sawiin, ‘Zophai kawng hi Inner Line Reserve (509 sq miles) nena inhnea awm a nih avangin, helai kawng hi tha taka thawmthat reng a pawimawh,’ an ti.
PWD SDO an biaknaah, thawmthat hna an thawh mek a, jungle clearance (kawng sir hnim tih fai) pawh a theih ang anga hma an lak tur thu a lo hrilh tih an sawi a ni.
Camp leh duty out post inkar chu sawrkar hmasaah khan lirthei lut theia siam niin, black top tura sanction chhuak vek tawh chu tuna sawrkar tharah laklet niin, sum sanction hi tih lapse a ni tih Bairabi MZP hian an sawi.
‘Furah a diak thin em avangin lirthei lut thei loin thui tak duty turin ke in an kal a ngai thin a. An tui lakna hi ‘intake’ mumal siam a ni loh avangin furah harsatna an tawk thin. 1st IR Camp-ah hian mobile network a chhe hle a, emergency-ah pawh chanchin inhriatpawh zung zung a har a; duty out post-ah solar street light an mamawh hle bawk,’ a ti.
Zophai kawng chu a pawimawh hle tih sawiin, Bairabi khua chhungkaw thahnem takin huan lo ram neiin leilet leh tuikhuah, kuhva huan an siamna hmun a ni a, fur ruahtui tam hma ngeia hma la tur leh mobile network tha an neih thuai theihnan hma la turin Mizoram sawrkar an ngen tih an sawi.
MZP Sub-Hqr’s, Bairabi hian Omega Centre tlawh nghalin, he Centre-ah hian naupang enkawl lai mipa 12 leh hmeichhia 6 an nei a, zirlai naupang thahnem tak an nei bawk tih an sawi.