DDK leh NHM-in thawhdunna siam

DDK leh NHM-in thawhdunna siam
National Health Mission Health & Family Welfare department Mizoram leh DDK chuan mipui hriselna leh zirtirna lama hriat tur pawimawh leh hmalakna hrang hrang program Doordarshan Aizawl-a tihchhuah thinna atana thawhdunna thuthlung an ziak.
DDK head of program C. Vanlalsiama chuan Information Education Communication (IEC) chungchanga state sawrkar hmalakna leh a hlawhtlinna sawrkar laipui lamah thawn thlak a ni thin tih a sawi a. Health leh agriculture allied chu mipui tan a pawimawh hle tih sawiin, hriselna lamah thawhdunna ziah bakah mipui tana tangkai tur zawnga thawhhona tha kalpui zel chu thil tul tak a ni tih a sawi.
NHM mission director Dr Eric Zomawia pawhin hriselna chungchang sawihona bakah mipui tana tangkai zawk kalpui chhoh mek a nih tur thu a sawi a. DDK nen an thawhdunna chuan NHM kaltlanga IEC chak zawk a thlen ngei a beisei bakah mipui mamawh phuhruk thei ang bera programme siam an tum tih a sawi. NHM hnuaiah ZMC, Civil Hospital leh Ayush tihmasawnna tur bakah Food & Drugs, Sub Centre leh PHC kalphung, rural health lam program siamna atan national programme 40 vel an nei mek tih a sawi bawk.
Health department leh DDK Aizawl thawhdunna atana program siam tur thupui atan “Mitin ban phak hriselna” tih a ni dawn a. Zirtawpni chawlhkar hnihna leh Inrinni ah tihchhuah a ni anga, thla khatah vawi 4 tih chhuah tum a ni.