India – Bangladesh rel tlantir leh dan tur sawiho dawn
chuan ramri kâna rel inkalpawhna tur chhunzawm lehna tur an sawiho hnai niin a lang.
Kum 2024-a mipui lungawi loten Sheikh Hasina-i sorkar paih thlaa an ram politic buai hnuah khan ram pahnihte inkarah hian passenger phur tlantir a ni ngai tawh lo.
Bungraw phur rel bik erawh chu thla kua tihtawp a nih hnuah nikum February atang khan chhunzawm a lo ni tawh a, passenger phur bik erawh a la kal leh lo a ni.
Bangladesh Railway thuneitute chuan Thawhlehni atang hian Dhaka-ah Indian thuneitute mikhualin ni hnih an inbe dawn niin news agency PTI-in a tar lang a. Maitree Express, Bandhan Express leh Mitali Express te tlantir leh chu Inter-Governmental Railway Meeting (IGRM)-ah hian an sawiho tur langsar ber nia hriat a ni.
Bangladeshi railway thuneitu pakhat chuan, “Naktuk atanga IGRM tan turah hian Maitree, Bandhan leh Mitali Express tlan chhunzawm leh dan tur pawh sawi a ni ang,” tiin Thawhtanni khan PTI a hrilh a ni.
Bangladesh hian Rajshahi khawpui leh Kolkata inkara rel thar tlantir tur pawh an chhawp chhuah rin a ni a. Hei bakah hian Maitree Express chu Dhaka leh Kolkata inkarah Jamuna Bridge kân lova tun hnaia dawh thar, Padma Bridge zawh zawk tawh turin an rawt dawn bawk.
Ram pahniha rel thuneitute hian an pawm a nih chuan ramri kâna tlan thin rel pathumte hi thla thar atangin an tlan chhunzawm leh mai dawn nia sawi a ni a. Hetih rual hian tlan tak tak leh tur chuan ram pahniha ministry-in an pawm leh phawt a la ngai dawn tho a ni.
Maitree leh Bandhan Express relte hi July, 2024 atang khan Bangladesh-a tharum thawhna avangin tihtawp a ni a. A tirah chuan hun tiam chin neia tihtawp rih tura tih a ni a; mahse, a hnu lamah chuan nghet taka tihtawp ngai a ni ta zawk a. Mitali Express pawh hi Dhaka pana a tlan hnuhnung ber chu July 17, 2024 kha niin India-ah a lo let leh tawh rih lo tih railways thuneitute chuan PTI an hrilh.
Maitree Express hi Dhaka leh Kolkata inkara tlan niin Bandhan Express hi Khulna leh Kolkata inkara tlan a ni thung a. Mitali Express hi Dhaka leh New Jalpaiguri inkara tlan thin a ni bawk.