16th Finance Commission an lo thleng

16th Finance Commission chu nimin Pathianni khan lo thlengin, Hunthar lei tla hniam an endik nghal a, Mizoram sawrkar hnuaia a kaihhnawih mi pawimawhte nen ruahmannate an sawiho nghal bawk.
Mizoramah ni 4 chhung cham tur an ni a, an cham chhunga theihtawp chhuaha kan lo dawr a pawimawh dawn hle. Chumi pawimawhzia hrechiangtu chu ram hruaitute leh official-te an ni.
Assembly Session kal mekah Lengpui Airport chungchang sawiho a nih khan, chief minister chuan duhthlan tur pathum kan neih thu a sawi a, 16th Finance Commission lo kalte hnena theihtawp chhuaha Lengpui Airport chungchang lo thlen chu duhthlan tur hmasa ber a ni. Indian Air Force kuta Lengpui Airport hlan remti lo NGOCC te pawhin theihtawp chhuaha 16th FC lo dawr turin a ngen bawk a nih kha. Finance Commission hian an lo kal hma hian kan state dinhmun hi an zirchiangin an hrechiang em em dawn tih a hriat a, eng pawh lo dil ila, ‘anni tan chuan dil awm reng a ni’ min tihsak thei tur an ni awm e. Lengpui Airport chungchanga kan harsatna chinfelna tur hi Grants-in-aid huang atanga ngaihtuah theih a nih pawh a rinawm a. Sawrkar laipui lam hian disaster hi an ngai pawimawh em em bawk a, tuna Hunthar lei tla hniam atana management pawh hi an ngai pawimawh ngeiin a rinawm.
Mipui tam zawkin kan hriat thiam phak tawk tur chu, tuna kan mikhualte hi mamawh thila sum leh pai thehchhuah chungchangah chuan ‘an thu a tlang dawn hle’ tih hi a ni mai awm e. Chutih rualin, kan ram hruaitute hian Mizoram mamawh hi eng eng nge an lo thlen a, engte nge hlawhtling ta tih hriat zui ve zel hi mipui chanvo a ni ve bawk a; mipui te hian kan chanvote kan chang ve zel turah i ngai leh phawt mai ang u.