Feyenoord boss thar Robin van Persie
Feyenoord boss thar Robin van Persie
Football khelh a chawlhsan hnua coaching lam luhchilh zui ta Robin van Persie chu a inkhelh career bul tanna Dutch club hraw Feyenoord ngeiin head coach thar atan an senglut.
Heerenveen coach hlui hian Premier League club lian pahnih Arsenal leh Manchester United thuam a inbel hmain Feyenoord lamah hming a lo chher ve tawh a, game 122 a khelhah goal 46 a khung tling nghe nghe.
Kum 2019 khan football khelh a bansan a; tunah kum 41 mi niin, player ni chunga tum hnih zawma a lo zawm tawh Feyenoord chuan an senglut leh ta a, tuntum erawh a kawk kual zawngin a ni ve ta thung!
Nikum May thlaa Heerenveen manager ni tura a chhuah hma khan Feyenoord-ah Van Persie hian Dick Advocaat-a hnuaiah khan assistant coach hna a lo chelh tawh bakah he club youth team a lo hrual tawh bawk.
Netherlands international hlui hian Heerenveen kha game 23 khelhpui hmanin, a chhuahsan lai khan Dutch top flight (Eredivisie)-ah pakuana an ni a, khati zat game-ah khan vawisarih chiah Heerenveen a chakpui!
Feyenoord-ah hian kum 2027 thleng thawk turin contract a ziak a, assistant coach atana a hman Rene Hake hi Manchester United-ah Erik ten Hag-a coaching staff pakhat a lo ni ve tawh nghe nghe.
A club thar chungchang sawiin, mi zawng zawngin Feyenoord nena inzawmna thuk bik an neih thu an hriat vek thu leh beiseina sang tak nena hmalam a thlir thu a sawi a, staff khawng tak leh player-te nen thawkho chungin ke an penho dawn tih a tarlang tel.
Feyenoord hian Eredivisie table-ah pathumna luah mekin, hmahruaitu Ajax lakah point 11-in an hniam a; Van Persie hma chiaha an rawih Dane Brian Priske hnuaiah khan league game an khelh hnuhnung vawirukah vawikhat chiah chakin, karliamta mai khan an petchhuak zui ta nge nge a ni.
Nikum nipui lai khan Priske hian Liverpool lama chhuak ta Arne Slot a thlak a, tunah Van Persie chuan a nekchhuak ta a ni.
Dutchman Van Persie hian kum 2004 atang khan kum riat chhung Arsenal-ah hun a hmang a, kum 2012-a Manchester United a zawm hma khan Gunners chu FA Cup title lakpuiin, Old Trafford a zawm hnua a season hmasaberah Premier League title a lakpui nghal thung.