Point 11 a fal Liverpool in champion an hnaih

Pathianni zan khan English Premier League khelh chhunzawm a ni a, inkhel ngaihven hlawh taka table-a hmahruaitu Liverpool chuan si hnih faiin champion lai Manchester City an hneh. City lakah point thum an hmuh leh tak vangin Liverpool hian point 11 zetin hma an hruai fal tawh a, champion an hnaih deuh deuh zel. Pathianni zana inkhel dangah Newcastle United chuan an mikhual Nottingham Forrest an hneh a, top 5 huangah an inhlangkai ve bawk.
Dal theih loh Salah
Kar laihawlah Aston Villa laka hnehna chang zo lo Liverpool hi Inrinni zanah Arsenal an tlawm vangin an phur a, inrintawkna thar nen Etihad Stadium-ah an leng lut. An lenluhna mualah an khel tha viau a, champion zia an pu nawn leh. Reds hian City lakah goal pawh an thun thuai. Inkhel tan atanga minute 14-na lekah Mohamed Salah chuan hmahruaina goal a thun. Salah hi season kal mekah a khel tha tluang hle a, EPL-ah goal 25 zet thunin top-scorer a ni mek a. Inelna hrang hrangh goal 30 thun tling tawh bawkin dal theih a ni tak tak lo.
An mualah goal chhuah hmasa zawk an nih vangin City in goal thun ngei tumin tan an khawh zui a, hlauhawm pawh an siam thuai. An player thar Marmoush chuan goal thun bawk mah se off-side vangin hnawl a ni. City hian na takin an khingpuite nawr bawk mah se goal an chhuah belh leh ta zawk. Liverpool player ten fuh taka ball an inpek kual hnuin Dominik Szoboszlai chuan minute 37-naah Ederson dan rual lohin a pet goal a, Reds goal hnihna a thun. Chawlhlawk hmain goal dang a luh belh thei lova, si hnih faia hmahruai chungin Liverpool in chawlhlawk an hmang.
Chawlhlawk hnu lamah Liverpool an khel tha chhunzawm a, goal an thun belh leh thuai. He goal hi VAR rawn a nih hnuin hnawl a ni ve leh ta thung. Reds hian goal thun belh thei tawh lo mah se goal si hniha an hmahruaina an humhim a, champion lai Mancheser City lakah hnehna changin point thum hlu tak an hmu.
Team lian Manchester City lakah hnehna an chan leh tak vangin Liverpool in point 11 zetin hma an hruai fal ta a, champion an hnaih deuh deuh zel. Kar laihawlah beisei ang result nei lo mah se kar tawp kha Liverpool tan hun tha a ni a, an elpui lian top 4 huanga awm te chak an awm lo. Pahnihna Arsenal chu an mikhual West Ham United hneh lovin an tlawm a. Pathumnaa awm Nottingham Forrest chu Newcastle United lakah an tlawm a, Liverpool hian City an hneh bawk. An elpui liante an chak loh laiin an lo chak leh bik vangin Liverpool hian champion theihna hun tha leh zual an nei. An chesual fe a nih loh chuan Arne Slot-a’n EPL-a hun a hman hmasak berah a team a champion nghal tura ngaih a ni.
Panganaah Newcastle
Pathianni zana inkhel hmasa zawk, inkhel hmuhnawm takah Ne3wcastle United chuan an mikhual Nottingham Forrest chu 4-3 in an hneh a, panganaah an inhlangkai.
Newcastle United tan hian chuan fuh zetin a tauh goal a, striker ngaihven hlawh tak Alexander Isak chuan goal hnih a thun a, Lewis Miley leh Jacob Murphy ten goal khat ve ve an thun bawk. Pathumnaa awm mek Nottingham Forrest hian St James Park-ah bul ta tha viau mah se Callum Hudson-Odoi, Nikola Milenkovic leh Ryan Yates te goal thun chu point hmuhpui nan an hmang zo lova, uiawm takin tlawm zawkah an tang.
An mualah an chak vangin Newcastle hi panganaah an inhlangkai. An chung chiaha awm Manchester City nen point 44 an hmu dun mek a, pathumnaa awm Nottingham Forrest nen point thum chauhin an inthlau mek bawk. Heti hi a nih vangin Magpies hian champions league khelh phak beiseina sang tak an nei a. Top 4 huang luah phak tumin thapui an thawh zui ngei ang.