PARTYNEXTDOOR & Drake ‘$ome $exy $ongs 4 U’ a No.1

PARTYNEXTDOOR & Drake ‘$ome $exy $ongs 4 U’ a No.1
PARTYNEXTDOOR leh Drake album intawm “$ome $exy $ongs 4 U” chu Billboard 200 (albums) chart No.1-ah a debut a, PARTYNEXTDOOR tan he chart-a No.1 kai thei album pakhat a neihna leh Top 10-a lang thei album palina a neihna niin, Drake tan a No.1 album 14-na leh a Top 10 album 17-na a ni ve thung. Drake hian Jay-Z le Taylor Swift te record nih rualin, soloist zinga he chart-a No.1 kai thei album ngah ber an niho ta a, overall-ah pawh No.1 album 19 nei thei The Beatles chiah an pha lo.
Billboard 200 hi kar khat chhunga US-a album hralh tam dan atanga tehin chart ranking siam thin a ni a, album hralh zat chhut nan hian album tak tak hralhna bakah streaming atanga album tlukpui leh album-a hla mal hralhna atanga album tlukpui te belhkhawm thin a ni. “$ome $exy $ongs 4 U” hi 2,46,000 hralhin chung zinga 2,19,000 chu streaming (on-demand official stream maktaduai 287.04) niin, album tak tak hralh chu 25,000 a ni a, hla mal hralhna atangin 2,000 a tling thei bawk.
Drake a rawn No.1 leh ta hian boruak a nei riau mai a, No.1-ah Drake-a’n Lamar a rawn thlak ve leh chiah bawk a, hei hian a tingaihnawm lehzual ta a ni. Anni pahnih inkarah hian neuh neuh a tam khawp mai a, nikum March thla atang khan hlathu hmangin an inkap tawn deuh sak sak a, Kendrick Lamar hi a dinhmun a tha deuh zawk ni ten a lang a. Hla thu hmanga an inbakkaih deuh hnua Drake album tlangzarh leh hmasak ber a ni.
“$ome $exy $ongs 4 U” hian Kendrick Lamar album GNX rawn thlakin, GNX hi 1,36,000 hralh lehin No.1 atangin No.3-ah a tawlh a, tun hi Drake leh Lamar te No.1-a an inthlak kual vawi khatna a ni, Billboard albums chart top three a tum khata an awm rual vawi thumna a ni taw bawk.
Chart No.1 hlui Sabrina Carpenter ‘Short n’ Sweet’ chu 1,56,000 hralh lehin No.7 atangin No.2 a kai thar leh ta a, chart No.1 hlui bawk SZA ‘SOS’ chu 93,000 hral lehin No.2 atangin No.4-ah a tawlh a, chart No.1 hlui bawk Bad Bunny ‘Debí Tirar Más Fotos’ chu 67,000 hralh lehin No.4 atangin No.5-ah a tawlh a, chart No.1 hlui bawk The Weeknd ‘Hurry Up Tomorrow’ chu 58,000 hralh lehin No.3 atangin No.6-ah a tawlh ta bawk.
Chappell Roan ‘The Rise and Fall of a Midwest Princess’ chu 49,000 hralh lehin No.5 atangin No.7-a a tawlh a, Billie Eilis ‘Hit Me Hard and Soft’ chu 46,000 hral lehin No.6 atangin No.8-ah a tawlh a, chart No.1 hlui Morgan Wallen ‘One Thing at a Time’ chu 39,000 hralh lehin No.8 tangin No.9-ah a tawlh a, Kendrick Lamar ‘DAMN’ chu 33,000 hralh lehin No.9 atangin No.10-ah a tawlh ta bawk.