Kuthnathawktute mawhpuh hian anmahni vote-tute rilru hliam na – Lalnunmawia Chuaungo

Kuthnathawktute mawhpuh hian
anmahni vote-tute rilru hliam na
– Lalnunmawia Chuaungo
Hmunphiah leh sawhthing hralh chungchangah ZPM-in an sawrkar hmaa a intiam anga kal loa, an dik lohnaah kuthnathawktute mawhpuha thiam loh a chantir leh daih chuan anmahni duhsaka vote tlingtu mipui rilru a hliam sak tih Congress hruaitu Lalnunmawia Chuaungo chuan a sawi.
Local council leh village council inthlan zawh taka Mizoram hmun hrang hranga lawmthu sawia zin MPCC senior vice president Lalnunmawia Chuaungo chuan Ningani khan Hrangturzo East Block huamchhunga Congress ticket-a tling village council member-te chawimawina North Vanlaiphai-ah a hmanpui a. ZPM sawrkarin vantlang sum a enkawl dan chu a fuh lo hle a, an nawm an maka an hman mai mai tur a ni lo tih a sawi. “An intiam ang ngeia fel leh tha taka hman hi an tih tur a ni. Hmunphiah chingtute dinhmun an tikhaw lo zo a, sawhthing tih ral dan an sawi dan thenkhat phei chuan tlakranna a thlen dawn bakah a hralh leh a lei kawngah an chiang lo em em a ni. Sawrkarin a tih dik lohah kuthnathawktute mawhpuhin thiamloh a chantir a, hei hian anmahni duhsak taka vote tlingtu mipui rilru thuk takin a hliam sak a. ZPM sawrkarah mipuiin beiseina an nei tlem tawh hle,” a ti.
ZPM kum khat sawrkarah mipuiin beiseina an nei hniam nghal hle nia sawiin, Aizawl leh Lunglei khawpuiah mipuiin Congress-ah rinna an nghat a. MLA leh MP inthlan aiin Congress vote share nasa takin a pung tih a sawi.
Mizoram mipui tan NLUP chu tang puihna nena kaikawpin ruahmanna fel tak nen sawrkarna chelh hun pawha kalpui mai theih turin siam a ni dawn Congress hruaitu hian a sawi a. ZPM sawrkarin an campaign laia engkim research base veka hma la nghal tura inzuar kha an arkhawthimdai a, hmunphiah chingtute dinhmun an tihchhiat sak a, sawhthing chungchangah kuthnathawktuten man man taka an hralh chu Congress party chuan a duhsak em em rualin, heti mai maia sawrkarin sawhthing lei leh hralh a kalpui chu kuthnathawktute pawi nasa takin an khawih dawn tih a sawi.
“Mipui kaihhruaina kawnga an tlin ngang loa, an term hi an hmang tluan thei dawn pawha a lan loh avangin a kaihruai thei Congress party kan inbuatsaih mek a ni,” Lalnunmawia Chuaungo hian a ti.