Card eng leh pawl hmangtute tan kutzia chhut hmanhmawh a ngai

Card eng leh pawl hmangtute tan
kutzia chhut hmanhmawh a ngai
Ration buhfai lak zui zel duh card eng leh card pawl hmangtute tan sawrkar laipui thu angin retailer-te hnenah ePos khawlah kutzungpui chhut a ngai a, Mizoramah ti lo an la tam a, kumin March 31 thleng chauh hun a awm tawh. Hetihlai hian mahni khua/veng ah tih kher a ngai loa, tuna an awmnaa retailer-te hnenah mahni ration card number leh Aadhar number hriat chuan a tih theih vek a ni.
Food Civil Supplies & Consumer Affairs secretary Terresy Vanlalhruaii chuan, e-KYC hi kumin February 13-a Mizorama tih tan a nih atanga March 5 chawhma dar 10.00 thleng khan 197435 in an ti tawh a. NFSA (National Food Security Act) hnuaia ration card holder 696692 atanga chhuta zaa 28.34 a ni. e-KYC la ti lo hi a tam zawk an la nih avangin card eng leh pawl hmangtuten hun tiam chhunga ti hman ngei turin ngaihpawimawh a tul hle tih a sawi.
e-KYC hi kumin March 31 thlenga kalpui tur a ni a. Hemi hnu lamah chuan a tih theih tawh dawn loh tih sawiin, NFSA hnuaia ration card nei zawng zawng chuan hun tiam tawp hmaa e-KYC ti vek turin an ngen nawn tih a sawi.
Zawhna chhangin FCS&CA secretary chuan, kutzungpui nemthat ngai hun hi a tawp hun chuan sawrkar laipui lamin kutzungpui nem chin zel chauh hi thla quota a rawn pe tawh dawn a, in khata cheng pawh e-KYC ti lo an awm chuan chumi chu an rawn chhawk mai tawh dawn tih a sawi a ni. “Ration card atanga an hming paih leh paih loh chu centre thu a ni a, e-KYC ti chin zawng buhfai allocation a rawn siam thung dawn,” a ti.
Kum upa pawn chhuak thei tawh lo leh damlo khumbet ang chi chu a nawlpui an tih zawh hnu ah retailer-ten an kalchilh dawn a, damdawi ina enkawl ang chi erawh ruahmanna thar la siam ngai tur a ni tih a sawi a ni.
e-KYC hi NFSA beneficiary ration card-a hming chuangte a takin an la awm ngei em, NFSA buhfai a thlawna dawng tura allocation la siam kep tur an la awm reng em, tih te chianna atan leh, lamhlaa hnathawk (migrant worker) ten khawi hmunah pawh NFSA ration an lak theihna atana tih a ni a; Supreme Court thupek a ni.
eKYC hi Covid hrileng avanga migrant worker-ten ration lak chungchanga harsatna an tawh nasat avanga PIL case kalzelin a hrin chhuah a ni a. Supreme Court thupek bawhzuiin sawrkar laipui Ministry of Consumer Affairs, Food&Public Distribution-a Department of Food & Public Distribution chuan e-KYC ti turin state tin hnenah thu a pe a ni.
8 e-KYC hi NFSA ration beneficiary (card eng leh card pawl nei) chhungkaw member tinin an tih a ngai a. Card var nei tan tih ve a ngai lo.
# e-KYC hi fair price shop-ah retailer-te hnenah mahni ration card number leh Aadhar number hre chunga kal a, ePos-ah kutzungpui nem mai tur a ni.
# India ram chhungah khawi retailer hnen atang pawhin ration card number leh Aadhar card number hriat chuan kutzungpui nem hi a tih theih vek.
# Retailer-ten an hnena e-KYC ti tura kalte an hnar tur a ni loa, FCS&CA department chuan hemi chungchangah hian hriattirna a tichhuak tawh.
# India ram pawna awm mekte erawh ram chhunga an lo let hun hunah e-KYC hi an ti ve mai dawn a ni.
# Natna leh harsatna dang avanga in chhuahsan thei lo te tan a hranpaa ruahmanna siam tum a ni.
# Naupang kum 6 hnuailam, biometric data la laksak theih lohte chungchang hi ministry-in a ngaihtuah mek a, an thu ngaihchan a ni.
# Aadhar update ngaih avanga khawlin kutzungpui thla a lak that theih lohte awm theih a, hetiang harsatna nei chuan mahni awmna atanga Aadhar Centre hnai bera update nise.