EMRS Tipa a chhiat thu MLA-in House-ah sawi

EMRS Tipa a chhiat thu MLA-in House-ah sawi
Eklavya Model Residential School (EMRS) Tipa chu a chhe hle a, fur laiin zirlaiten nihliap khumin lehkha an zir thin niin Palak bialtu MLA K Hrahmo chuan a sawi.
Nilainia Assembly Session-ah Palak bialtu MLA hian EMRS Tipa (Tuipang) thawmthat a ngaih thu hi sawichhuakin, a school tlangchhipa awma a nih avangin thli leh ruahin a bawh na a, rangva hi liang chin chiah chih niin, bathlar a khuh thleng loa, fur lai phei chuan tui a lut a, naupangin kut lehlamin nihliap an khum a, lehlamin zirlai an ziak a, an ke lam tuiin a chim thin niin a sawi.
“Lehkhathiam ngaihna a awm lo, an khawngaihthlak lutuk,” MLA hian a ti a. Rangva hi chih that tumna a awm leh awm loh a zawt a ni. Residential school ni si zirtirtu quarters a awm loa, school room pakhatah an mukhawm mai nia sawiin, quarter sak belh tumna awm leh awm loh, a awm loh pawhin sak sak theih a ni em, tih a zawt a ni.
Social Welfare & Tribal Affairs minister Lalrinpuii chuan, EMRS Tipa chungchang hi a beng a la thleng loa, a zia lo hle tih sawiin, department hotuten an lo enzui tur thu a sawi. Hmun thenkhata quarters sakna tur pek an ni a, an lo ngaihtuah tur thu a sawi a ni.