NGO-ten Union Home minister hmu Thu thlen pui ber a hrang theuh nei

NGO-ten Union Home minister hmu
Thu thlen pui ber a hrang theuh nei
Zan khat riaka Mizoram rawn tlawhtu Union Home minister Amit Shah chu pawl hrang hrang aiawhten hmu in thu an lo thlen a, ngaihpawimawh hrang hrang thlenin a hrang theuhin thu thlen pui ber an nei a ni.
NGO Coordination Committee hminga an lo hmuhna an thu thlen ho zingah, Lengpui Airport tih changtlunna sum ruahman sak tur leh tichangtlunna atan ruahmanna siam turin an ngen a. Union Home minister hian Lengpui Airport chu tihchangtlun a duh a, a ngaipawimawh tih hrilhin, Airport Authority of India (AAI) in a buaipui tur thu a sawi. Thla thum chhungin AAI hian thil tul zawng zawng an buaipui anga, thla ruk chhungin tihchangtlun hna an tan tur thu a sawi a ni.
NGOCC chuan kan ram rohlu zing ami, Lengpui Airport tihchangtlunna tura ruahmanna siam a ni chu lawmawm an tih thu sawiin, Union Home minister chungah an lawm tih an sawi rualin, Lengpui Airport tihchangtlunna tura theihtawp chhuaha ngaihtuahna sengtute leh mipui tanrualnaah an lawm tih an sawi bawk.
Central YMA hruaitute chuan Myanmar, Bangladesh leh Manipur atanga Zohnahthlak raltlan chungchang an sawipui a. Home minister hian raltlante tanpuina turin kuminah state sawrkar an rawn pe dawn tih a sawi. 8th Schedule-a Mizo tawng dah luh a nih theihnana hma lak sak tura an ngen chu, tunah diltu engemawzat an awm mek a, an lo en tur thu in a chhang a ni.
Free Movement Regime (FMR) pawh sawiin, India leh Myanmar inkara FMR tih bo a nih lohnan hma la tura ngenna chu sawi ho ngai thil a ni tih a hrilh a, Mizoram atangin New Delhi-ah an aiawh mi 10 intir tur leh Home ministry aiawhte nen sawiho turin a chah. BSF Mizo Battalion hranpa an sawipui chu a hranpa in siam theih loh tih Amit Shah hian a hrilh a, chutihrualin Mizo thalai tam zawk BSF-a an luh theihna turin ruahmanna an siam tih a hrilh a ni.
Mizo Zirlai Pawl chuan zirlaite tana hmasawnna tur thil hrang hrang an sawipui tel tih an sawi a. Thingtlang, a bikin border area-ah school building tihchangtlun a ngai nasa tih hrilhin, zirlaiten harsatna an tawh thin hrang hrang an thlen. Union Home minister chuan MZP thil thlen chu thil pawimawh tak a nih avangin, state Sawrkar nen tangdunin hma an lak tur thu a hrilh a. Sum ngai tur chu sawrkar laipui atangin theihtawp chhuaha ngaihtuah pui a tum thu a sawi a ni.
MZP chuan Mizo thalaite central service leh All India service-a an lut tlem ta lutuk chu hma lakpui turin an ngen a. A bik taka Mizo zirlaite tan ruahmanna siam tur leh, coaching facility ngaihtuah sak turin an ngen. MZP thil thlen hi lo enzui a tum thu Amit Shah hian sawiin, coaching center changtlung tak Mizoramin a neih theihnan ruahmanna siam a tum tih a sawi a ni.
Mizo zirlai, a bikin thingtlang leh hmun hla zawka awm zirlai harsate tan ‘National Integration Tour’ buatsaih sak turin MZP hian an ngen bawk a. Home minister chuan Border Security Force kaltlangin thil tih theih mai a nih thu a sawi a. Hma a lo lak tur thu hi a hrilh a ni. Zirna kaihhnawih hrang hrang bakah hian India leh Myanmar inkar hung tumna leh Free Movement Regime thiah a ni chu Zofate inpumkhatna atan tha an tih loh thu ziakin a thlen a ni.
Zo Re-Unification Organisation (ZORO) pawhin Union Home minister hnenah hian Manipur-a Zofaten administration hran an neih theihnan leh Free Movement Regime leh ramri hung chungchang ziakin an thlen a. Manipur-a Zofate leh Meitei inkara buaina kal zelah ‘administration’ khata awm ho a harsat tur thu leh Zofaten separate administration hran an neih theihnana hma la turin an ngen. FMR tih tawp a ni chuan harsatna nasa tak a thlen tih sawiin, hemi chungchang ngaihtuah nawn a, FMR dah leh turin ngen tih leh, India sawrkarin Burma nena inrina hung a tum chuan a chhehvela cheng Indigenous hoin harsatna nasa tak an tawk dawn a, UNO-in an dikna chanvo a pek a ni tih an thlen.