Union Home minister khan ZPM ka hmuh dan min zawt – Zoramthanga

Union Home minister khan
ZPM ka hmuh dan min zawt
– Zoramthanga
Tunhnaia Union Home minister lokal khan ZPM sawrkar a hmuh dan a zawt a, ngaihdan a la sawi mai theih loh thu in a chhang tih MNF hruaitu Zoramthanga chuan a sawi.
Lungleia thu a sawinaah MNF president Zoramthanga hian, tunhnaia Amit Shah a lokal khan Ministry of Home Affairs lam ruahmanna in a hmuh ngei an duh a, appointment an lo siamsak a, Union Home minister khan ZPM sawrkar a hmuh dan chu vawi khat mai ni lo a zawt tih a sawi. “Ka chhanna chu, an inzir mek a, kum hnih thum a liam phawt loh chuan ngaihdan ka sawi thei mai lo ka ti a, mak a ti khawp mai,” a ti.
Sawrkarna an chelh lai, Assam nen ramria sipai an inkah tum khan, Union Home minister hian ramria an sipai awmte lalet turin thinrim takin a rawn bia tih sawiin, “Ka sipaite ka hnuhkir in hmuh hma in ka banna in hmuh hmasak ka ring, tiin ka chhang,” a ti.
Mizo nationalism humhim tura thisena baptist, underground-te chiahin he hnam thuthlung hi an keng loa, ramhnuaia rammu ve lo nunaute, Mizo zawng zawngin he hnam humhimna tura man kan pek hi a tam em em a, mipui hlei hlei kha a tuartu an ni tih Zoramthanga hian a sawi. “Fahrah, hmeithai, rualbanlo, nunna chan tam tak an awm. Chu a man kan pek chuan Mizo nationalism hi a humhim a ni. Thisen seng a, nunna tam tak luanralna, Mizo hnam tana a man kan pek zozai, harsatna zozai avang hian Mizo hnam tana tlanchhiat ai chuan, chief minister dinhmun kalsan kha pawi tihna ka nei lo,” a ti.
MNF movement, hnam thinlung putna leh Mizoram tana theihtawp an chhuahnaah khan Burmaa unaute, Manipur leh East Pakistan, Assam leh Shillong-a Zofa zawng zawngin an tuar vek a. Chu chu hnam anga chimral kan nih lohna pawh a ni tih a sawi. “India hmarchhak en ila, Shillong leh Manipur-a dawrkai lian zawng zawng hi Vai dawr a ni a, Mizoram erawh a ni lo. Heng zawng zawng hi Mizo mipuiin a man tam tak an pek vang a ni. Thangtharten an hriatreng tur chu, hei leh chen hi Lalpa’n min awmpui a, Jehoa hian hnam tam tak hnena chanchintha hril turin Mizo hnam hi a humhim a. MNF hi a ral mai mai dawn lo, thawhchhuah leh ni a nei dawn,” a ti.
Nilaini khan MNFpresident hian Ex Mizo National Army buatsaih ‘Kawmzawl Ambush’ hlawhtlin hriatrengna lungphun chu Lunglei Pukpuiah a hawng a. He lungphun hian hnam pasalthate tumruhna, taimakna, huaisenna, hnam thinlung an putna, Vai sipaite laka ram tana hnehna an chan dan hriat thar tirtu lo nise a duh tih a sawi a ni.