Income tax pe tura tih thin MIMA-in an harsatna thlen

Income tax pe tura tih thin
MIMA-in an harsatna thlen
Mizorama sumdawng pawl intelkhawmna, Mizoram Merchant Association (MIMA) chuan Income Tax department hotu hnenah income tax chawi tura thin an ni chu India danpui kalh a nih dan leh hemi avanga an buaina an thlen.
Income Tax principal chief commissioner NER Guwahati Nav Ratan Soni chu Mizoramah a lokal a. Zirtawpni khan Central YMA, MIMA, chartered account firms, Aizawl Treasury leh NHIDCL a thutkhawm pui.
MIMA hian ziak leh tawngka in an lo thlen a. India danpuia Section 10(26) of Income Tax Act-in scheduled tribe tan chhiah (tax) awl tura a tih angin, Mizote pawhin kan lakluh atanga chhiah pek tur (income tax) hi kan awl tur a nih laiin, MIMA member tam tak chuan chhiah chungchanga hriattirna leh insawifiah tura hriattirna an dawng a, kum hnih- thum kalta mai ni lo, kum 10 kalta amite an rawn tih avangin chhinchhiah leh vawnthat a lo harsa tawh a. Hetiang chhiah la pe ngai lo tan phei chuan chhanlet a harsa tih an sawi.
Heng chhiah chungchanga hriattirna hi hai der a nih chuan hremna (penalty) tawh theih a ni a, a thenah phei chuan mimal bank account pawh freeze sak hial a ni thin a, ‘nil return’ an duh chungchang sawifiah tura a ngen lehzel a, nil return thehlut tur hian to tak taka chartered accountant rawih an ngai a, tum loh lutukin sum tam tak an insen phah thin tih an sawi a ni.
Income Tax official-te atanga hriattirna an dawn danah mi, an PAN card azirin chhiah an awlin an awl lo nia a lan thu MIMA hian lo thlenin, ‘Tribal kan nih zia tarlanna document chi hrang hrang kan thehluh nawn hnuah pawh he hriattirna hi a rawn kal fo a. He buaina hi thleng leh tawh lo tura min pui turin kan ngen a che,’ an ti.
Income tax, PAN card leh heti lam kaihhnawih buaina chinfel pui tur leh, tanpui turin Mizoramah jurisdictional assessing officer dah sak turin an lo ngen bawk.