Asia record bu-ah Mizo tlangval

India ram record a siam tawh a, Asia record pawh a lo siam; Asia Book of Records bu-ah Vanlallawmzuala varte hming a chuang ta e.
Vanlallawmzuala Varte, LZ-a tia koh hian nikum khan thirsakawrin India ram state zawng zawng leh Andaman & Nicobar Islands tih loh UT dang zawng a tlawh chhuak a, India ram record pahnih a siam. Heta a record pakhat zawk hi Asia khawmualpui record pawh a lo ni reng a, Asia Book of Records bu-ah ziah luh a ni ta a ni.
LZ-a hian thirsakawra India ram state hrang hrang leh UT heti zat a fan kual hian, heti zat tlawh chhuak tura hun hmang rei lo ber record a siam a, ni 285 chhungin km 17,045-a thui a tlan a ni. Vawi khat zin chhuaha chho zawnga thirsakawra tlan thui ber record a siam bawk. Hemi pahnih hi India Book of Records bu-ah ziah luh a ni.
Nikuma state leh UT hrang hrang a fan kual hian thirsakawrin chho zawngin metre 113278-a thui a tlan a, chu chu India ram record a ni. Hei hi India ram record chauh ni lovin Asia khawmualpui record pawh a lo ni a, Vietnam-a hmunpui nei Asia khawmualpui record chhinchhiah thintute’n Asia Book of Records buah an ziak lut ta a ni. February ni 17 khan hei hi an nemnghet a, chumi hnuah ziah luh a ni.
Chho zawnga a thirsakawra a tlan laia hautak a tih chu Ladakh leh Jammu & Kashmir vela a tlan lai a ni a, khua a vawh bakah hritlang chungin thirsakawr hi a khalh.
Ngaland atangin Manipur-ah a lut a, chuta tang chuan Kohima-ah let lehin, Kohima atang hian Aizawla an chenna in, Mission Veng a tlan thleng leh. Mizoram a luh hnu, Kawnpui dai atanga Sakawrhmuituai tlang vel thlenga chho zawnga a inkhalh vel lai kha, state leh UT engemaw zat a tlan hnu a ni bawk a, hautak a ti bawk.
“Asia record ka siam dawn tih ka inhre lo a, a hnuah pawh ka siam tih hi ka hre chuang lo a. Hetia record ka lo siam hi mak pawh ka ti a, ka lawm khawp mai,” LZ-a chuan a ti.
“Mizoram cycling chanchinah thu lawmawm hriat tur kan nei hi lawmawm ka ti a, cycling boruak tinung se ka ti khawp mai,” a ti bawk.