I ‘ex’ kha i thlah fel tawh em?

I ‘ex’ kha i thlah fel tawh em?
Inthen hi a hrehawm a, a harsa kan ti thin. A thentu zawk i ni emaw, a thena zawk i ni emaw a harsa ve ve. Chumi dawta harsa leh kan then taka te thlah fel hmak hi a ni. Anih leh i ‘ex’ chu i thlah fel hmak tawh a, i rilruah a thi tawh a, nangmahah hmun a chang tawh lo tih engtin nge i hriat theih ang? In boruak hlui te chu i theihnghilh tawh a, i kalsan tawh tih inhriat theihna awlsam ni a relationship lama mithiam te sawi kan rawn tarlang e.
1. Amah i hrechhuak reng tawh lo. I inthen hlim kha chuan harsa i ti a, i thil engkimah amah i hrechhuak zel a. Mahse, tunah chuan chutiangin ani chu i hrechhuak reng tawh lo a nih chuan i kalsan fel tawh tihna a ni.
2. Inhmu thut pawh ni ula i chet buai i inring tawh lo. Mi zingah emaw, khawiah emaw i ‘ex’ nen chuan rin loh takin inhmu thut pawh ni ula nangmahah engmah danglamna a awm i ring tawh lo a nih chuan i kalsan tan tawh tihna a ni.
3. Midang nen i khaikhin tawh lo. In inthen hnuah midang nen in in-date ve leh a, i hlim viau a, i chhas thar chu i ‘ex’ nen i khaikhin ngai miah lo a nih chuan i ‘ex’ chu i kalsan fel hmak tawh a ni. Mahse, chuti ni lova i la khaikhin ru deuh thin a nih chuan i ‘ex’ chuan i rilruah hmun a la chang deuh tlat tihna a ni.
4. Ngaihzawng dang neih leh kher tul i ti lo va, confi takin i ‘single’ a, a in inngaihzawn lai boruak kha i ngai tawh ngai lo a nih chuan i ‘ex’ kha i kalsan tawh tihna a ni.
5. Hmalam hun phur takin i thlir thei tawh a nih chuan i ‘ex’ chu i kalsan tawh tihna a ni.
6. Tu emaw i tawng a, i tek deuh sek sek a nih a, eng emaw tak inzawmna neia inhriatna nen i phur thar riau a nih chuan i ‘ex’ chu i kalsan ta tihna a ni.
7. I ngaihzawng hlui chu i ngaihtuah chhuah apiangin i thinrim a, amah chu i hua a, i ngei thin. Mahse, chutiang chu i ni ta lo va, engmah i ngai lo thei ta a nih chuan i kalsan tawh tihna a ni.
8. In inngaihzawn laia in hla duh tak mai, ‘Kan hla’ in lo tih ve thin ngei mai kha, in inthen hnuah nangmaha engmah danglamna awm lo va i ngaithla thei tawh a nih chuan i ‘ex’ chu i thlah fel tawh tihna a ni.
9. Social media lamah i veh ru tawh lo. In then hlimah chuan social media lamah i ngaihven ru reng a, eng nge a tih, tu thlalak nge a ‘like’, eng nge a post tih vel thlengin i ngaihven a, mahse, chutiang zawng zawng chu i ngaihven tawh lo a nih chuan i kalsan tawh tihna a ni.
10. In pahniha in thil lo tih dun tawh, engtikah mah i theihnghilh thei pawha i inrin loh kha i theihnghilh then nual tawh em? Inthen hnuah hun a lo liam deuh hi chuan kan tum em em vang pawh ni chuang lovin theihnghilh thei pawha kan inrin loh te hi kan lo theihnghilh ve leh mai thin.