India-in Myanmar puihna phur thleng leh

India-in Myanmar puihna phur thleng leh
Indian Air Force C-17 thlawhna hmangin Pathianni khan field hospital-a mamawh leh ei tur a phur lut leh a. Indian Army-in Operation Brahma tia Myanmar-a lirnghing tuarte tanpui hna a thawh mekah hian field hospital a dinah damlo 800 vel enkawl mek an ni.
Sipaite chuan X-ah India-in Myanmar a puihna hi tar langin, “Kan Field Hospital chuan damlo 800 a enkawl tawh a, Sr. Gen. Min Aung Hlaing pawhin vawiin khan a tlawh,” an ti.
“IAF C17 hmangin a mamawhtute tan ei tur phurh thlen leh a ni a, kan NDRF team chu hlawhtling taka an tih tur an tih hnuah a phur haw nghal,” an ti.
Inrinni khan India hian Myanmar-ah hian ei tur tonne 442 a lo phur lut tawh bawk a. Thla hmasaa lirnghing na tak a tawrh hnuah a theih ang angin puihna a pe mek zel.
Ei tur phurh luhte hi buhfai, tel, noodle leh chhang niin Indian Navy ta, INS Gharial hmanga phurh niin Thilawa Port-ah Ambassador Abhay Thakur chuan Yangon Chief Minister U Soe Thein leh a thuihhruaite hnenah a hlan a ni.
Myanmar-a Indian Embassy chuan, “A tuartute mamawh pek an ni a. Indian Navy landing ship tank INS Gharial chuan vawiin khan Thilawa Port-ah ei tur tonne 442 phur thlengin Ambassador Abhay Thakur-a’n CM Yangon U Soe Thein & team hnenah a hlan a ni,” tiin X-ah an tar lang.
March 28-a lirnghingin Myanmar a sawi hnuah khan India hian tanpuina beihpui thlak, Operation Brahma a tan a. India hi a thleng hmasa pawl niin chhanchhuah, chhawmdawl leh an intun din lehna tura puitu a ni.
Prime Minister Narendra Modi-a pawhin Zirtawpni khan Myanmar Senior General Min Aung Hlaing chu BIMSTEC Summit neihna, Bangkok, Thailand-ah a hmu.
An inkawmnaah Modi-a hian an mamawh a nih chuan India chu pui turin a inpeih reng tih a hrilh a. Mipui sorkar din tura inthlan felfai neih thuai tha a tih thu a hrilh bawk niin Foreign Secretary Vikram Misri chuan a sawi.