KNP-a cheetah tui petu driver bân

Kuno National Park (KNP), Madhya Pradesh-a lirthei khalhtu atana an chhawrin cheetah leh a note hnena tui a pe lai video nasa taka social media-a a darh hnuah sorkarin kaihhruaina a neih angin he driver hi bân a ni.
Forest department-in a chhawr driver hian steel bowl-in Prime Minister Narendra Modi-a kaihhruaia Project Cheetah kalpui meka Namibia atanga lak luh, Jwala leh a no pali chu tui a pe a ni.
Video-ah hian Jwala hnenah hian ‘lo kal rawh’ a ti lai a lang a, cheetah pawh hian zaidam taka panin a note hian an zui a, bowl-a tui chu an in ta a ni.
Thuneitu pakhat chuan field staff-in inkaihhruaina a bawhchhiat avangin a chungah hremna lek a ni tih a sawi.
“Video siamin nasa taka thehdarh hian inkaihhruaina a palzut a, a chungah hremna lek a ni,” tiin Additional Principal Chief Conservator of Forests (APCCF) Uttam Kumar Sharma chuan a sawi niin news agency PTI chuan Pathianni khan a tar lang.
Jwala leh a note hi KNP ramri bul mai, Agra range-a mihring chenna hnaih takah tui hi pek an ni.
“Monitoring team hian cheetah lo chhuak hnai lutuk an awm chuan ramngawah an hnawt kir tur a ni a, hei hi mihring nena intihbuaina a awm lohna tur a ni a. Lo emaw, mihring awmna hnaia an kal a nih chuan thawktu dang pawh koh zawk tur an ni a. He thil thlengah hian Agra range-a field staff-te pawh koh belh an ni,” a ti.
Jwala leh a nite hi chhuna lo leh mi chenna hnaihah an kal nasa a, ramngawa an kir leh theih nan tui hi pek niin a sawi bawk.
Tunah hian India-ah hian cheetah 17 an awm mek a, heng zinga 11 hi a no niin park chhungah hian an tla a, pakua erawh dah hran biknaah an la awm.
Namibian cheetah pariat, a nu panga leh a pa pathum chu KNP-ah hian September, 2022 khan chhuah an ni a, hengte hi khawmualpui dang atanga zawhte lian chi lak luh hmasak ber a ni a. February, 2023 khan South Africa atangin a dang 12 lak luh leh an ni bawk.
Ramngawah hian cheetah 26 an awm mek a, heng zinga 14 chu India-a piang an ni.