Lungleia kawtha lo luak leng mekah tui harsa nen sawizawm

Lungleia kawtha lo luak leng
mekah tui harsa nen sawizawm
Tunlai hian Lungleiah kawtha lo leh luak avanga damdawi in pan an tam tih sawi a ni a. Tui harsatna avanga tuikhur tui tih thianghlim mumal loh tlan vang nen sawizawm theih a ni tih sawi a ni.
Thudawn danin, Lungleia damdawi in 5-a emergency case an neih dan enin, naupang leh puitlingah pawh kawtha lo leh luak vanga lut hi hun dang aiin tunhnaiah an pung tih hospital-a thawktute hian an sawi a. Puitling aiin naupangah an tam zual tih sawi a ni.
Lunglei Civil Hospital bakah kohhran leh mimal damdawi inah tun hnai kar thum chhung velin kawtha lo leh luak avanga pantu an ngah thu hi an sawi vek a. Fur ruahtui tlak hnu ah heng natna avanga pantu hi an tam thin kumtin rualin, kuminah erawh fur ruahtui tlak tak tak hma in an tam ta hle tih sawi a ni.
Damdawi in thawktute hian anmahni pantute hnenah tui chhuan so that in turin an lo hrilh tam hle tih an sawi a. Lungleia tui harsatna thlen hnu ah PHE department leh Lunglei Municipal Council pawhin mipuiin tui thianghlim lo an tlan lohnan theih ang angin hma an lo la tawh a ni.