World Table Tennis Day lawmna
World Table Tennis Day lawmna
Nimin, Nilaini zing dar 7 khan Kawltheihuan, Mission Venga Mizoram Table Tennis Hall-ah Mizoram Table Tennis Association (MTTA) huaihawtin World Table Tennis Day lawmna hun hman a ni.
Khawvel pumah kumtin April ni 23 hian World Table Tennis Day lawm thin a ni a, Mizoram Table Tennis Association pawhin kum 2018 atang khan lawm ve tanin, tanpui ngai tanpuina’n te, table tennis-a mi bikte chawimawina’nte a lo hmang tawh thin a ni.
Table Tennis for All
Mi zawng zawng tan – naupang tan, thalai tan, puitling leh upa lam tan, pianphunga rualban lo tan, mi hausa leh mi rethei tan pawh a khelh theih a, TT hi mi zawng zawng tan a ni.
Hetiang a nih avang hian niminah pawh age group hrang hrang an fuankhawm a, lawmpuina leh chawimawina an hlan takte pawh hi age group hrang hrang, skill leh talent hrang hrang neite an ni hlawm.
Promoter chawimawina
Table tennis leh player-te tana mi tangkai leh thawhhlawk bik a nih avangin kumin World TT Day-ah hian MTTA chuan H. Duhkima an chawimawi a, thuziak an hlan.
A ni hi player, club leh district association-te an ipte a puarna’na ngaihtuahna seng leh a taka che thin hruaitu a ni.
A tawi zawnga sawiin, Duhkima hi club, district leh MTTA level tournament buatsaih a nih tumin a theihna zawn atanga sum ngaihtuahpui thintu a ni a, amah avanga programme tam tak hlawhtlinna Mizoram TT-in a lo hmu tawh thin a ni.
PHE department-ah hman atanga tun thlengin TT hi a nung em em reng a, Mizoram Civil Service & Cultural Sports Association annual sports (inter deptt sports) tiropuitu an nih thinna phenah hian Duha hi hmuhhmaih thiang hauh loin a inthukru kuk tih tlang hriat a ni!
TT player-te dinhmun a hrethiam a, thla tina hlawh la thei tur zawngin mi pasarih emaw lai remchang a ngaihtuahpui a; a thahnemngaihna zar zo player engemawzat an awm chu MTTA hian hmuhhmaih loin lawmawm an ti a, an chhuang a, sorkar lamah kumin hi a hun hnuhnung a lo ni nen, World TT Day-ah ngei chawimawi phu an ti a, chawimawina thuziak an hlan ta a ni.
National level technical official
nih lawmpuina
MTTA-in umpire training a buatsaih atanga umpiring lama inhmang chho tan K. Lalrinsanga lawmpuina hlan a ni bawk.
Ani hi TT lama Mizotea’n hma kan sawn a, rual kan el a ngai a ni tih hretu a ni a, India rama inelna ropui ber – kan Olympic ve National Games-ah Mizoram aiawha tum hnih technical official/umpire ni thei hmasa ber a ni a, a record siam hi Mizoram TT chuan a lawmpui a, an chhuang bawk a ni tih lantirna’n chawimawina an hlan a, chutih rualin MTTA thuchhuah chuan tam zawk leh nasa zawka a inhman zel an duhsak thu an tarlang tel.
TT vanga ram pawna hna hmu lawmpuina
Lalrinpuia:
Nikum March thla khan ICC, Milpitas, California atangin visiting coach tura sawmna a dawng a, thla li chhung (April – August) atan a ni. A zu kal a, thla li a awm tlin hma hauhin a ngheta coach ni turin an sawm zui ta mai a!
Indawrna kalpui chhunzawm zel niin, hlawh leh chenna turte offer a ni a, nikum kum tawp lamah khan rilru siamin, inremna neih a ni ta a, kumthar tirah khan hnathawh phalna leh visa-te a hmu ta hlauh bawk a, hlawh tha zawk nen a hna hi a thawk chho ta a ni
Lalhunhlua:
Kum 2024 May thla khan a dil angin SAI hnuaia assistant coach atan interview tura kohna a dawng a, May ni 14 khan New Delhi-ah a zuk interview a, mi tam tak inlan karah May ni 30 khan he hna hi offer a ni a ni ta a, Bholpur SAI Centre-ah post a ni zui a, hemi hmunah hian a thawk mek a, Mizo TT player-te tan a tangkai chho tan hle zel a ni.
November ni 22-29, 2024 chhung khan Helsingborg, Sweeden-ah World Youth Championship nghah a ni a, India team head coach Massimo Constantin nen an zuk hruai dun a, hetiang dinhmun sang chang thei hi MTTA chuan a lawmpuiin a chhuang hle tih an tarlang.
Anni pahnih bakah hian John Zamliana leh Alberto Lalremruatate chuan Indian Audit & Account Department-ah sports/TT quota hmangin Auditor hna an hmu a, 19th June 2024 khan offer of appointment pek an ni.
John-a hi Bangalore-ah post a ni a, Alberto hian Kohima-ah a hna thar a zawm ve bawk.
Indian Audit & Account Department hnuaiah tho hian TT quota bawkin Jeho Himnakulhpuingheta chuan clerk hna a hmu ve thung a; ani hian offer of appointment hi nikum June ni 24 khan hmuin Agartala, Tripura-ah post a ni a, hetah hian a thawk mek a ni.Lawmpuina dang
Residential academy-a lut thei tura ‘trial’ paltlang Mizo TT player 10-te hnenah World TT Day pualin lawmpuina hlan an ni bawk a; nikum atanga tun thleng hian player 10-in ‘trial’ an paltlang tawh a, hmeichhia leh mipa hi panga ve ve an ni.
Carolyn Malsawmkimi hian NCOE Kolkata-ah ‘trial’ hautak zet hmachhawnin, mi tam tak karah a tling a, tunah hian he hmunah hian TT a zir mek a ni.
Lalrinpuii, Lalmuanzeli, Aaron Ramdinpuiate chu SAI Centre Bholpur-a awm turin an tling a, tunah hian an training ve mek bawk a.
SAI (SCOE) Goa, residential training centre-a awm turin Mizo naupang paruk dangin ‘trial’ an paltlang a, thla thar May ni 4 hian Mizoram an chhuahsan tawh dawn a ni.
Chu’ng mi paruk lawmpuina hlante chu – Isak Malsawmdawngzuala, Mission Lalpekhlua, Lalremkima, Vanlalmalsawmkima, Vanlalrinzuali leh Vanlalhriatpuiite an ni.