Competitive football-a kirleh tur Ronaldinho!

Competitive football-a kirleh tur Ronaldinho!
Kum 46 mi lek a la ni bawk a, Brazil football icon leh World Cup winner ni bawk, Ballon d’Or chawimawina pawh dawng tawh Ronaldinho chuan competitive football a khel leh dawn a, thla thar mai hian Italian third-tier club Ravenna tan Forli a hmachhawn dawn!
November ni 15 match khel tur hian kumin June thla daih tawh khan a Thianpa Ignazio Cipriani club Ravenna nen inremna an ziak a, a hnu lawkah club-a chanpual nei ve turin inremna thar an ziak zui leh a, chanpual neitu nihna nen competitive match hial a khel zui dawn ta a ni.
He thu hi karliamta Zirtawpni khan Serie C club Ravenna chuan khawvel hriatah puangin, inkhel bul a Tan dawn nge hun tawp dawnah a lut ve lek chauh dawn tih tarlan a awm lo a, kan hriat chhun chu, Cipriani sawi danin, an club tihlarna tur leh an khawpuiin club an ngaihven phah beiseina vang a ni.
November ni 15 match hi kum 2015 daih tawha Brazilian club Fluminense tana a inlan hnu lama Ronaldinho competitive match khelh leh hmasakber tur a ni.
Kum 2016-a official-a football khelh chawlhsan fel tawh Ronaldinho hian 2002 World Cup-ah Brazil a champion-pui a; 2005 Ballon d’Or award a dawng bawk.
Brazil great Ronaldinho hi a vang laiin Barcelona leh AC Milan forward a ni Thin a; a Thian hnai tak Ignazio Cipriani sawmna chhangin kumin August thla khan Italy a thlawklut a; kha mi Tum pawh khan team (Ravenna) puih a duh thu leh a career-a a goal 300-na tur thun ngei a duh thu a lo sawi chhuak tawh a ni.
Ronaldinho inlanna tur derby hi Ravenna inkulhna Stadio Bruno Benelli-a khelh tur niin, Ravenna hian game 10-a point 20 hum chungin Serie C Group B table-ah pahnihna an luah a, point riatin hmahruaitu Spezia an pha lo.