Contractor-ten sawrkar an phut Dan anga tender chhan an duh
Mizorama contractor-te chuan an hna kaihhnawihah sawrkarah thil phut engemawzat an nei a, a hlawhtlin hma loh chuan na taka nawr zui an tum tih an sawi. Class 1 atanga class IV contractor ho intelkhawmna – All Mizoram Contractors Association hruaitute sawi danin, tender loa duhsak zawng hna inpek chu dan kalh a nih angin tender ngei nise an duh tih an sawi a. Tender chhan a nihin dan ang taka chhan thlap nise; hna chhuak apiangah sawrkarin contractor-te tan zaa 30 tal dah zel se, tiin an phut.
Contractor-te tan tender an chhanin earnest money ngai loa chhan tawh an duh a. Tunhnaia tender chhanna man to ta lutuk chu sawrkarin bithliah tha turin an phut tih an sawi bawk.
State dangah chuan sawrkar hnuaia contractor-te chu department bik sawi loin, works department dangah pawh hna an thawh theih tho laiin, Mizoramah chuan PWD hnuaia contractor tan works department dangah hna a thawh theih loh tih sawiin, ‘PWD hnuaia contractor-te department danga contract hna tender an chhang thei lo hi chhang ve thei se; department hrang hrang hnuaia contractor-te pawhin PWD hnuaiah tender chhang ve thei rawh se,’ an ti.
Contract hna awmah department work-a hna a tam lutuk chu tih tawp an phut tih an sawi bawk.
Mizoram pawn atanga company/ contractor hna bikah an ni hian a hlawk leh tha chin zawng thawkin, hna har lai leh hlawk lo deuh tura ngaihah tualchhung contractor-te tan sub contract-in hna an pe ve chauh thin tih an sawi a. Sub contractor-te tan zaa 25 work done neih theih chu zaa 35-ah tih san an phut tih an sawi a ni.
All Mizoram Contractors Association chhungah political party emaw sakhuanaa rin dan inan lohna emaw lakluh an remti ngai loa, tuna an thil phut chu an damkhawchhuahna tur a nih avangin sawrkarin a tihhlawhtlin sak hma loh chuan theihtawpa nawr an tum tih an sawi a. Heng an thil phut hi chief minister hnenah ziakin an thlen tih an sawi.
Pawl hruaitute sawi danin, contractor class hrang hrang zingah an member zat a che ve reng a, a chiah chiaha sawi theih a ni lo. Tunah hian class I – 124 vel, class II – 200 chuang, class III 230 vel, class IV 533 vel an ni. A tam zawk hi PWD hnuai ami an ni a, PHE ah 50 vel awmin, empanelled firm 140 chuang an awm a ni.
Contractor-te thil phut dang:
8 Contractor an thihin sawrkarin a ral
8 Sawrkarin contractor atana a pawm tawh chu renew ngai tawh loa kalpui
8 Sawrkar pawmpui contractor-te chu an lo upat a, hna an thawh theih loh hunah zangnadawmna pek
8 Contractor-ten an hnathawh theih chin bithliah awmah an thawh theih chin bithliaha contractor-te tender chhantir
8 Contractor-te an thihin an aiawh tir an nupui fanaute an awm chuan an aiawh phal ni rawh se
8 Tender a awmin a form man sumdawnna ang maia sang tak taka lei ngai tih tawp
8 Mizoram sawrkarin thlenna a neih tourist lodge, Mizoram House, bangla leh sawrkar department hnuaia thlen inah a man zatvea thlen.