Ella Langley- ACM Awards New Female Artist of the Year

Ella Langley-
ACM Awards New Female Artist of the Year
Academy of Country Music (ACM) Award chu May ni 8-ah an sem dawn chauh nain, award dawngtu an lo puang lawk tan tawh a Ella Langley chu new female artist of the year dawngtu a nih thu an puang ve leh ta. Langley hi kumin ACM Awards nomination-a langsar ber niin, nomination pariat a nei nghe nghe a ni. ACM Awards-ah hian Zach Top-a’n new male artist of the year a dawng tih kar kalta khan an lo puang tawh bawk.
Langley hian Rock the Country, Knoxville, Tennessee-ah stage-a a awm laiin a award dawn tur hi video kaltlangin Miranda Lambert-i’n a hriattir a, video-ah hian Lambert chuan, “Kumina Academy of Country Music Awards-a nomination a langsar ber artist i ni hi ka chhuang hle che ka rawn hriattir che a ni. Ka thian i ni a, ui chhanhim kawnga ka thawhpui, ka co-writer i nihna piah lamah country music-a ka sangawi zawnpui leh engkim ka tih pui theih i ni bawk. Dallas, Texas-ah pui takin kan lawm ang chu le!” a ti.
Kumin ACM Awards new female artist of the year category-ah hian Kassi Ashton, Ashley Cooke, Dasha leh Jessie Murph te pawh nominate an ni a, Ashton leh Cooke te hi he category-a tum hnih nominate an nihna niin, nomination-ah an lawng nawn thei tawh dawn lo va, Dasha leh Jessie te hi an vawi khatna ve ve niin, tum khat nomination-ah an la lang leh thei dawn thung.
Langley, kum 25, hi female artist of the year leh category pali dangah a hla hit, a lar chhuahna ni bawk ‘You Look Like You Love Me’ featuring Riley Green avangin nominate a ni a, he hla single of the year, song of the year, music event of the year leh visual media of the year-a te nominate a ni bawk.