MUHCS-a sawrkar hnathawk tel theih dan tur ngaihtuah tha dawn
Mizoram sawrkarin health care scheme thar a duanah sawrkar hnathawkte pawm theih dan ngaihtuahtu tur Committee din tum a ni a. Hei hi sawrkar hnathawk inzawmkhawm pawl pawhin a remti a ni.
Kumin April 29 khan sawrkar aiawh minister pathum leh Mizoram sawrkar hnathawk inzawmkhawmna – Federation of Mizoram Govt Employees & Workers office bearer-te an thukhawm a. FMGE&W-in Mizoram Universal Health Care Scheme-a an pawm theih loh lai siamrem dan tur sawi a ni.
Sawrkar aiawhte hian rawtna an siam a. MUHCS kalphung (system) fel lo lai ngaihtuah tha tur Committee din a, FMGE&W aiawh tel ve se an ti. He Committee hian system fel tak a duanchhuah hma chu sawrkar hnathawk leh an chhungte khawi hospital-ah pawh inenkawl theih; sawrkar hnathawkte medical reimbursement bill chu package rate awm loin damdawi ina an senso ang ang bill theih; sawrkar hnathawkte hlawh atanga contribution chu April 2025 atanga cut tura duan tawh anga cut, tihte a ni.
Sawrkar rawtna hi FMGE&W General Council chuan Ningani khan a ngaihtuah a. Sawrkara thlen tur rawtna an siam ve leh a ni.
Sawrkar hnathawkte medical reimbursement chungchanga sawrkar hotute rawtna ang chu kalpui tha an ti a. MUHCS hman tan a nih atangin sawrkar hnathawkten damdawi ina inenkawlnaah harsatna an tawh nasat avangin hemi chungchangah hian sawrkarin thuchhuah nei thuai se an ti.
MUHCS hman tan ni, 1.4.2025 atanga sawrkar hnathawk zinga damlo, mahni sum senga inenkawlna senso an bill let theihin sawrkar thuchhuah siam tur hian huam se; sawrkarin MUHCS-a system fel lo lai zirchiangtu tur Committee din ngei se, he Committee-ah hian FMGE&W aiawh telh ngei bawk se, tihte a ni.
Hetihlai hian sawrkar hnathawk hlawh pekchhuah tan mek a ni a. FMGE&W hnena rawtna a thlen zing ami, sawrkar hnathawkte hlawh atanga contribution chu April 2025 atanga cut tura duan tawh anga cut, tih chu kalpui nghal niin, Mizoram Universal Health Care Scheme atana an thawh tur cut saa Treasury-a thehlut tawh department chu pek hmasak zel an ni tih thu dawn a ni.
Department engemawzat chuan cut sa kher a ngaih dawn leh dawn loh ngaichangin Treasury-ah an la thehlut loa, an thehluh hunah hlawh hi pekchhuah zel tum a ni tih thu dawn a ni bawk.