Phalna nei loin skywalk siam – AAP

Phalna nei loin skywalk siam
– AAP
Mizoram AAP chuan Aizawla skywalk siam chu phalna nei loa siam a nih bakah a him dan tehnaah pawh tunlai hmanraw changkang hman a ni lo tih an sawi.
Thuchhuah siamin Mizoram AAP chuan, Aizawl Peak Resort Zuangtui ami skywalk/ skybridge, kumin February 18-a chief minister-in a hawn tak chu RTI-a zawhna chhan a nih danin, Aizawl Municipal huamchhungah AMC hriatpui loha sak a ni a, he skywalk neitu hi ZPM MLA nia sawi a awm tih a sawi.
‘He skywalk/ skybridge hi a tha in Mizoram tan leh Mizote tan inchhuanna tham a tling a. Amaherawhchu AMC huamchhung ami AMC hriatpui leh endik loha an siam hi a him tawk lo ang tih kan hlau hle a. Social media-a hmuh anga, balu bag 600 dahchhin hmanga a him tawk leh tawk loh enfiah a ni chu a tak a nih ngai chuan, modern technology tha ber hmanga enfiah a ni lo tihna a ni a, chhiatrupna thleng thei reng ni-ah ngaih loh a harsa kan ti hle,’ a ti.
He skywalk hi eng vanga AMC hriattir lo leh phalna nei loa siam nge tih leh, AMC lamin engatinge an hriatpui loha siam /sak chu hma a lak loh tih AAP hian zawtin, hemi phenah hian sawrkara thuneitu liante an inrawlh em, tih chu an zawhna a ni tih a sawi bawk.