BSF-in Rajasthan-ah Pakistan Rangers an man

BSF-in Rajasthan-ah Pakistan Rangers an man
Border Security Force (BSF) chuan Inrinni khan Rajasthan-a inrinaah Pakistani Ranger an man a. A hmain BSF constable Purnam Kumar Sahu chu Pakistan Rangers-in an lo man ve tawh bawk.
Sahu-a hi April 23 khan Ferozepur sector, Punjab-ah lo neitute kalpuia ramri a kân chu an lo man a ni.
Pakistani Ranger man hi tunge a nih puan a la ni lo va, BSF Rajasthan Frontier-in an kawl mek.
India leh Pakistan hian tihpalh thila ramri kân sipai an inmansak hi tha takin an inpe let leh thin a, tun tumah erawh Pakistan hian Sahu-a hi an kawl rei tawh a, India hian Ranger an kawl mek hi engtin nge an tih ve dawn hriat a la ni lo.
Ranger man a nih hnu lawkah hian Pakistani Army chuan Line of Control (LoC) hrula sector hrang hrangah silai an hmet puak leh a, hei hi ni 10 a zawna inkahhai bawhchhiaa silai an hmeh puahna a ni tawh.
Kupwara, Baramulla, Poonch, Rajauri, Mendhar, Naushera, Sunderbani leh Akhnoor-ah te silai hi hmeh puah niin Indian Army pawhin an chhang leh ve bawk tih sipaiten an sawi.
Tun hnaiah inkahhai bawhchhiat a ni nasa hle a, a tam ber hi Pakistani tanhmun atanga kah a ni thin a, thi leh hliam erawh an awm hriat a la ni lo.
Pakistan-in an man Sahu-a chhuah a nih theih nan hian inbiak pawh a ni fo tawh a; mahse, tun thleng hian Pakistani-te hian chhuah hun tur emaw, a dinhmun emaw engmah sawi an la nei lo.
Sahu-a hi ramri hrula Indian lo neitute vengtu tura dah, 182nd BSF battalion-a ‘Kisan Guard’ an tiha mi a ni a. Ramri hi tihpalha kân palh nia sawi a ni a, thing hlima a lo thu hahchawl chu Ranger-ten an man ta a ni.
BSF chuan hetianga tihpalh thila ramri kân palh an awm hian kalpui dan neiin lehlam ram nen pawh an indawr a, tha taka inchhuah leh mai thin a ni a. Tun tumah erawh Pakistani lam hian chutianga tih mai tumna an nei rih lo hle a ni.
Sorkar pawhin Pakistan hnenah hian BSF kaltlangin hetianga inhrensak reng tha an tih loh thu an thlen tawh a; mahse, an chhanna chu chhuah tur lam a hawi lohle niin thuneitu sang pakhat chuan a sawi.
Sector-level-a inbiakna pawh neih tawh a ni a; mahse, inremna a la awm thei lo va. Sahu-a hi Rangers hmunpui pakhat, Lahore-Amritsar axis-ah an dah nia hriat a ni.
Sipai nupui, Rajani-i pawh nau pai chungin Rishra, West Bengal-a Hooghly district atangin kar liam ta khan Punjab-ah a kal a. Chandigarh tumhnmunah an fapa leh an chhungte dang nen Ferozepur-a Sahu-a unit hotuten an lo dawngsawng.
Ram pahnih inkar hi April 22-a khualzinte tlawh nasat hmun, Pahalgam, Jammu & Kashmir-a khualzin 26 thah an nih atangin a chhe hle a. India chuan hetiang titu mi firfiakte chu Pakistan hian puiah a puh a. Pakistan-a Lashkar-e-Taiba firfiak pawl nena inkungkaihna neiten an tihah a chhal bawk.
Pahalgam beihna duh lohna avang hian India hian Pakistan lakah hrekna kalpuiin Indus Waters Treaty a titawp lailawk a, Attari-Wagah ramri a khar a, a palaite a ko haw a, Pakistan thil lak luh a khap a. Pakistani flag intarna lawngte pawh a lawngchawlhnaa chawlh a phal lo bawk.
An inkar a khik mek lai hian Pakistan sipaite chuan Abdali surface-to-surface ballistic missile chu Inrinni khan a enchhin a. Indian thuneitute chuan hetiang tih hi ‘invauna’ niin a sawi.
Khawmual atanga khawmual kahna, Abdali missile hi km 450-a hla kap thei a ni.