LADC-a sawrkar siam tur ala buai

LADC-a sawrkar siam tur ala buai
Lai Autonomous District Council-a sawrkar thar siam tumna chu ala buai rih a, chief executive member nilai hmalakna chu state sawrkar hriatpui loh a ni tih District Council & Minority Affairs department chuan a sawi.
LADC-ah hian chief executive member V Zirsanga kaihhruai ZPM sawrkar chu buk a nih hma in a keh darh leh a, hemi hma hian Council budget pawh pharh hman a ni. Mizoram sawrkar DC&MA secretary chuan hetianga Council sawrkar dinhmun a chian tak loh avang hian budget siam leh pharh bakah hna lak ang chi ti lo turin a hriattir a ni.
BJP MDC N Zangura kaihhruai BJP leh MNF thawhdunna sawrkar siam tumin larsap hnenah an thlen a. Larsap hian a lo pawmpui a ni.
Official taka CEM nilai paihthlakna a awm loh bakah amahin banna a thehluh bawk loh avangin a dinhmun hi a la chelh a. LADC chairman T Zakunga chuan V Zirsanga hi CEM atan pawm a nih hnuah ni 30 chhunga thlawptu a neih dan fiah tura tih a nih laiin, fiah a nih theihna tura LADC Session koh ni mah se, Session neih dawnah chairman leh deputy chairman an ban vangin Session hi neih theih a ni loa, hemi chungchang hi larsap pawh hriattir niin, LADC-ah ZPM sawrkar a din reng laiin CEM thar ruat a ni ta daih tih a lo sawi tawh a ni.
Hetihlai a lehlam pawl atang chuan, chairman leh deputy chairman an ban hnu ah pawh floor test nei turin hum tiam ral lo mah se, hma lak zuina a awm loa, larsap thu anga floor test nei tura hriattir nawnna pawh bawhzui a ni loa, V Zirsanga chuan thlawptu member a nei ngah tawk tawh lo tih sawi a ni ve thung.
CEM ni lai a la ban loh avang leh CEM thar tura larsap ruatin a dinhmun ala chelh theih loh avanga LADC sawrkar a chiri mek laiin, May 7 khan DC&MA secretary chuan V Zirsanga chu CEM a nihna hriattirna tihchhuah chu tihtawp leh hman zui tawh lo tur a ni a; LADC-a legislative business, administrative/ executive thutlukna siam reng reng, CEM thar tura ruat N Zangura’n thlawptu a ngah tawk tih a finfiah hma chuan tih loh tur a ni tih a sawi.