Union MoS-in Mizorama MSME kalpui dan enfiah

Union MoS-in Mizorama MSME kalpui dan enfiah
Union minister of state for MSME leh Labour & Employment Shobha Karandlaje chuan zan riakin Mizoram a rawn tlawh a. Nilaini khan Khawzawlah sawrkar office hotute nen an inkawm bakah Khawzawl leh Chawngtlaiah a tlawh.
Union MoS hi bawrhsap K Vanlalthiana hoin sawrkar department hotuten an lo dawngsawng a. An inkawmnaah SDO (Sadar) Suvigya S Chandra chuan Khawzawl district dinhmun powerpoint presentation hmangin a pe a, department hrang hrang hmalakna leh scheme kalpui a sawizau a ni.
Department hotute hi a hriat belh duh a zawt a, scheme hrang hrang – PMEGP, PM Vishwakarma, MGNREGA, PM KISAN, Jal Jeevan Mission leh department kaihhnawih a sawipui.
Hemi hnu hian Shobha Karandlaje hian Govt. Little Flower School tlawhin zirtirtute leh zirlaite a kawm a. PMAY(G) hnuaia sak in a tlawh bawk. Chawngtlaiah MzSRLM Rurban Centre, Passion Fruit Processing Unit leh Anganwadi Centre a tlawh a, khawtlang mipui a kawm a ni.
Thawhlehni khan Lengpui Airport a rawn thlen hnu ah Union MoS for MSME hian Sihhmui, Sairang leh Ramhlun Venga Prime Minister’s Employment Generation Programme (PMEGP) hnuaia hamthatna dawngte a kawm.
Sawrkar laipui ruahmannaa hamthatna dawngtuten an khawsak dinhmun chawikanna atan PMEGP hmanga eizawnna ngelnghet an nei thei chu lawmawm a tih thu a sawi a. Hamthatna dawngtute hmalakna azarah eizawnna siam belh a ni chu thawktute fakawm a tih thu a sawi. Thalaite thiamna tipung a, eizawnna ngelnghet siam belh zel chu PMEGP thil tum a ni, tiin, sawrkar laipui scheme hlawhtlinna changtu leh ram hmasawnna thlentu nih tum turin a chah.