INTERNATIONAL NURSES DAY 2025

Julie Vanlalsawmi
Assistant Professsor
Aizawl College of Nursing

International Nurses Day lo chhuah dan
Kum tin hian May 12 hi khawvel ram pum pui a “Nurse-te ni” atan hman thin a ni a, Nurse ten khawtlanga an thiamna hmanga thil tha tam tak an thawh thinte hriat nawn leh nan hman a ni thin.
International Council of Nurses (ICN) chuan kum 1965 daih tawh atang khan “Nurses Day” hi an lo hmang tawh thin a. Mahse kum 1974 a lo inher chhuah chuan Pi Florence Nightingale-i, Modern Nursing hmu chhuaktu piancham ‘May 12’ pual hian he ni hi khawvel pum puiah “Nurse te ni” puala hman a lo ni ta a ni. ‘Nursing’ kan tih mai hi a awmzia takah chuan mihring, ramsa, thlai leh thildang engpawh nunna nei te chhawm dawl a, duat leh dim tak a hma an sawn theihna tur atana an mamawh dan ang zel a lo tanpui tihna a ni mai a. Mahse ‘Nursing’ chu profession (thiam bik thil nei a hnathawh) pangngai a lo nih tanna bul chu Pi Florence Nightingale-i (Pioneer of Nursing) hnathawh rah a ni a. Amah hi Nurse, khawtlang tan a theih tawp chhuahtu a nih bakah Statistician ropui tak a ni bawk a. Kum 1883-a Crimean War a lo chhuah khan a ni hian sipai hliam tuarte chu nasa takin enkawl hna a thawk thin a, a thim a var pawh thlu lovin zanah pawh khawnvar chhiin damlo a kan kual thin a. Hei vang hian “Khawnvar Lalnu” (Lady with the Lamp) tia hriat lar a lo ni ta a ni. Ama hming chawi hian Nurse thawk thate hnenah India sawrkar chuan Florence Nightingale Award a sem thin a, Mizoram chhungah ngei pawh dawng enge maw zat kan awm ve tawh a ni.
(phek 5-na zawmna…)
“Nurse te ni” hi Mizoramah chuan kum 1975 atang khan hman ve tan a ni a. He ni pual hian khawvel ram hrang hranga Nurse-te chuan hunserh pawimawh tak tak te hmangin, vantlang tana thil tha tih na hun atan te, hriselna chung chang in zirtir na hun atan te, Nurse thawk tha te chawimawina hun atan te leh Nurse te dinhmunin chawi san tawn nan te hman a ni thin.
Theme elaboration
Kan sawi tak ang khan kumin kum 2025 a “Nurse te ni” puala thupui thlan chhuah “Our Nurses. Our future. Caring for nurses strengthens economies” hi Mizo tawnga han sawi dawn chuan ‘Vawin nia Nurse-te hi kan ram dinhmun ei leh bar/sum leh pai (economy) ti thatu te leh la ti thang zeltu tur te an nih avangin kan ngaihsak a, kan tanpui a, chhawm dawl an ngaihna laia lo chhawm dawl zel leh nurse hna lo chawisan pui’ tihna a kawk ber awm e.
Nurse-te hian kan hnathawh na hmunah hian harsatna tam tak kan tawh leh kan mamawh phuhruk loh a rei tak awm te hi hriat puitu leh hma min lak puitu kan mamawh a. Kum tin mai hian Nurse mamawhna a sang tual tual mai a, mithiamte chuan a chhan berah chuan mihring dam chen a lo rei tawlh tawlh tak vang te, kum upa kan pun tual tual vang te, hripui leng leh natna inkai chhawn theih loh (non-communicable disease) kan tih te a hluar tak em vang a ni an ti. Nurse mamawhna a san tulh tulh rual hian nurse indaih lohna pawh a nasa tual tual mai a, khawvel ram pui puiah nurse indaihlohna zat hi maktaduai 5.9 lai a ni hem mai. Kum 2022-a Institute for Health Metrics and Evaluation-in a zir chiannaah chuan khawvel pum pui a hriselna lam inenkawlna hmun hrang hrangah damlo ten enkawlna tha zawk an dawn theih nan chuan tuna nurse hna thawk lai mek te bakah hian nurse maktaduai 30 lai kan mamawh belh tih an hmu chhuak a. Chuti chung chuan ram tam zawk chuan an ram damdawi inah a tlem thei ang ber nurse chhawr leh hlawh pawh an phu tawk aia hniam fe a chhawr an la thupui reng chu a ni a.
Hemi avang hian nurse-te chuan harsatna tam tak an tawk nasa hle a, mipui atangin nawrna a sang a, nurse-te lakah tharum thawhna hial a thleng a, khawtlangah leh social media kaltlangin sawiselna an dawng nasa hle mai bawk a, hei vang hian rilru leh taksa lamah harsatna tawk tam tak sawi tur an awm a ni. Tin, nurse-te hian kan phu ang tawk hlawh kan dawn loh avang te hian hmun tam takah chuan Nurse hna zahawm tak si kha ngaihnepna a tam hle mai a, hei hian nursing zir tur pawh tam takin a tih tlem phah a ni.
Ram changkang zawk USA, UK, Canada leh Australia-ah te chuan Nurse ten ram dinhmun economy chawisanna kawnga an thawh hlawkzia hriain an ram sawrkawrte chuan Nurse ten tha leh zuala hna an thawh theih nan leh Nurse tam zawk an neih belh theih nan an invest nasa hle mai a. India ram chhung thlir pawhin State tlaberh ve tak ni thin Kerala chuan a state chhunga cheng mipuite chu Nurse hna hlutna te hriattirin Nursing zirna in 30 lai a din a, semi-government 13 a din bawk a, tin, private-a zirna 133 lai a awm bawk a, hun a lo vei chuan chu chuan nasa takin Kerala state chu a lo ti thang nasa hle tih mitin kan hmu thei a ni.
Mizoram dinhmun kan thlir chuan tunah hian Mizoram chhungah Sawrkar Damdawi in 15 a awm a, anni hian belh bawmin khum 1506 an nei a; tin, Private damdawi in hi 26 a awm a, anni hian belhbawmin khum 1760 an nei a ni. (Hospital Statistics 2023-2024, Directorate of Hospital & Medical Education). Tin, Mizoram chhunga Registered nurse awm zawng zawng hi 5521 an ni a, heng zinga 5046 hi thawk lai mek emaw registration la nung an ni a. Tin, Foreign-a thawk Mizo nurse hi tunah 111 kan nei a, tin, India ram chhung Mizoram state pawna thawk hi 767 kan nei bawk a ni. (Mizoram Nursing Council). Mizoram chhiarpui 2023 in a tarlan dan in tuna Mizorama cheng zat hi mihring 1,252,000 kan ni a. Chumi awmzia chu Mizoram chhunga registered nurse active lai mi 5046 awm te zingah hian Nurse pakhatin mihring 248 zel a enkawl a ngai tihna a ni. Hei hian nasa taka Nurse indaihlohzia a ti lang chiang hle mai a, tin, nurse zirna institution pawh hi tunah 13 chauh a awm si a, hei hian nasa taka hma lak kan ngaihzia a pho lang a ni.
Vawin ni “Nurse te ni” May 12 a lo thlen hian hmun hrang hrang a Registered Nurse leh Nursing zirlai zawng zawng te Nursing profession chawisanna kawngah leh ram leh mipuite tana malsawmna ni turin tan la thar leh turin kan han insawm a. Tin, ram hruaitu leh vantlang mipuite pawhin kan harsatnate min hriatpuia chhawmdawl kan ngaihna laiah te min lo chhawmdawl a, kan ram dinhmun chawisang turin Nurse te pawimawhna min lo hriatpui a, min lo tlangau pui a, hma min lo lakpui theuh turin kan sawm che u a ni.
Chhiartu zawng zawngte TNAI Mizoram Branch hmingin International Nurses Day chibai kan buk che u a, vawin ni hun nuam tak hmang theuh turin duhsakna kan hlan a che u.
Nursing Profession vul zel rawh se.

Come let us here together stand
All nurses trained on Indian’s strand
And vow our service to our land
With loyal heart.
In garb of spotless white we dress,
All purity of life express
Triumphant we shall onward press
To serve our country.
With gentle hands the sick to serve
Attending all with heart and nerve
From duty’s path we shall not swerve
In dangers hours.
Our skilful care devotion true
Will banish sickness health renew
Our nation we shall thus imbue
With hope and courage.
Then let us always thoughtful be
To help suffering humanity
And may our motto ever be
We live to serve.